Issa li pajjiżna irreġistra livell rekord ta’ tkabbir ekonomiku, ħolqien ta’ impjiegi u livell baxx ta’ defiċit, il-gvern qed jimmira li baġit li jmiss iżewweġ din il-prosperità ekonomika, ma’ miżuri li joffru inklużjoni soċjali u ġustizzja soċjali.
Huwa għalhekk li t-tema għad-dokument ta’ qabel il-baġit 2017, li ġie ippreżentat illum, hija Prosperità b’ Ġustizzja Soċjali.
L-edukazzjoni, is-saħħa u s-sigurtà soċjali se jkunu tlett prijoritajiet ewlenin fil-baġit għall-2017.
Is-solidarjetà soċjali, li dejjem kienet fil-qalba tal-baġits ta’ dan il-Gvern, mistennija jkomplu jissaħħu fl-2017.
Dan filwaqt li inizjattivi li jnaqqsu n-nies dipendenti fuq is-sigurtà soċjali. Fl-istess ħin mistennija tkun indiriżżata l-problema ta’ kirjiet għolja.
Għall-qasam tal-edukazzjoni, fid-dokument ta’ qabel il-baġit, il-gvern ikkommeta ruħu li jkompli jtejjeb il-kwalità tal-ħiliet tal-ħaddiema. Mistennija jissaħħu miżuri għal min jitlaq mis-sitema edukattiva kmieni, min jitlef ħafna ġranet ta’ skola u jkunu introdotti skemi ta’ xogħol fuq bażi ta’ volontarjat fost oħrajn.
Il-gvern ikkommetta ruħu li jkompli jżid l-istipendji skont l-għoli tal-ħajja u li jgħin lill-għalliema jkomplu jitħarrġu fid-dawl tal-irwol kruċjali fl-edukazzjoni ta’ uliedna.
Għall-qasam tas-saħħa l-gvern huwa kommess li jkompli jelimina l-problema tal-mediċini out-of-stock, itejjeb l-aċċess għas-saħħa u jnaqqas il-listi ta’ stennija.
Dan permezz tal-introduzzjoni ta’ charter tad-drittijiet tal-pazjenti li jżomm lill-gvern kontabbli maż-żmien ta’ stennija u serviżżi li għandhom ikunu offruti.
Fid-dokument ta’ qabel il-baġit il-gvern ikkommetta ruħu li jżid l-infieq fis-saħħa pubblika u li jħares lejn iktar negozjati mas-settur privat biex jistabbilixxu s-servizzi tagħhom f’ pajjiżna.
Biex dan l-infieq ikun sostenibbli, l-gvern qed iħares li jżid l-investiment f’ oqmsa tal-enerġija u l-ilma, it-trasport u l-infrastruttura u t-turiżmu.
Fis-sena 2017, pajjiżna se jaħsad il-frott ta’ proġetti li saru fis-snin li għaddew mill-Korporazzjoni għas-Servizzi tal-ilma, bil-bini ta’ ċentri li jittrattaw l-ilma użat li mistenni jnaqqas l-użu tal-ilma mill-ġibjuni.
L-enerġija wkoll se jibqa’ settur ewlieni t’ investiment, bl-Enemalta issa fuq saqajha fejn saħansitra mistennija tagħmel profitt għall-ewwel darba s-sena d-dieħla.
Il-ħidma se tiffoka fuq sorsi t’ enerġija nadifa u rinovabbli, bl-introduazzjoni ta’ solar farm policy fost oħrajn.
Dan filwaqt li mistenni jkun hemm progress sostanzjali fit-twaqqih tal-power station tal-Marsa.
Għal darb oħra l-gzira għawdxija mistennija tingħata promenenza fil-baġit tas-sena d-dieħla, filwaqt li fil-qasam tal-ġustizzja, l-gvern huwa kommess li jnaqqas id-dewmien fil-każijiet tal-qrati biex itejjeb l-aċċess għall-ġustizzja.
