Sal-lum, madwar 500 kandidat applikaw għall-Iskills Pass.
Żvelat dan il-gazzetta KullĦadd hekk kif spjegat li l-iskills pass fil-qasam tat-turiżmu u l-ospitalità twassal biex kull min jaħdem fis-settur turistiku ikollu għarfien bażiku tal-lingwa Ingliża, ta’ Malta u tal-prodott turistiku lokali kif ukoll irid ikun imħarreġ fil-customer care.
L-Iskills Pass għat-turiżmu u l-ospitalità ġie introdotta f’pajjiżna fit-8 ta’ April filwaqt li fit-28 ta’ Mejju għaddiet il-liġi.
Minn April, persuni minn madwar id-dinja setgħu jirreġistraw u jniżżlu il-ħiliet tagħhom fis-settur f’żewġ fażijiet. Il-kandidati kollha jridu jgħaddu mill-ewwel fażi u dawk li ilhom Malta inqas minn sena, jew għadhom ser jibdew jaħdmu f’Malta jridu jgħaddu mit-tieni fażi wkoll.
L-ewwel fażi li hija online tinkludi korsijiet u eżamijiet f’suġġetti differenti, filwaqt li t-tieni fażi tinkludi intervista biex tikkonferma dak li sar fl-ewwel fażi li bdew fil-25 ta’ Ġunju. L-appuntamenti għall-intervisti tat-tieni fażi qed jintlaqgħu kuljum kemm f’pajjiżna kif ukoll minn ċentri barranin.
Minn madwar il-500 kandidat li applikaw għall-Iskills Pass. madwar 60% minnhom ser jaħdmu fis-settur tat-turiżmu f’Malta għall-ewwel darba.
L-aktar nazzjonijiet li applikaw għall-Iskills Pass ġejjin min-Nepal (22%), mill-Indja (20%) u mill-Filippini (14%).
S’issa huma biss ħaddiema ġodda li ġejjin minn pajjiżi barra mill-Unjoni Ewropea u li biħsiebhom jaħdmu fit-turiżmu u l-ospitalità f’Malta li jrid ikollhom l-iSkill Pass skont il-liġi.
Minn Jannar li ġej, il-ħaddiema fit-turiżmu u l-ospitalità li ġejjin minn pajjiżi barra mill-Unjoni Ewropea u li se jġeddu l-permess tax-xogħol iridu japplikaw għall-Iskills Pass.
Minn Jannar ta’ sena wara, fl-2026, l-impjegati kollha fl-industrija tat-turiżmu u l-ospitalità irid ikollhom l-Iskills Pass.
Mill-bidu tal-Iskills Pass b’kollox ittieħdu u tlestew 1,338 eżami li jinkludu customer care bażiku, Ingliż bażiku għall-ospitalità u l-prodott turistiku Malti.
L-aktar xogħol popolari li qed jiġi applikat għalih u li qed isiru l-eżamijiet tiegħu huwa dak tal-Commis Chef, jiġifieri dawk li jaħdmu fil-kċina.
S’issa nħarġu madwar mitt ċertifikat tal-Iskills Pass komplut, li jfisser li l-kandidati ċċertifikati issa jistgħu jaħdmu fl-qasam turistiku f’pajjiżna.
