Ħafna drabi nassoċjaw l-ispazju mal-illonċjar tar-rokits, mal-osservazzjoni tas-smewwiet, u mal-missjonijiet fuq il-qamar jew lejn pjaneti oħrajn. Madankollu, l-ispazju huwa ferm iktar minn hekk u t-teknoloġiji li huma relatati ma’ dan il-qasam illum il-ġurnata jiffurmaw parti mill-ħajja ta’ kuljum tagħna, forsi ferm aktar milli qatt nobsru.
Għadd ta’ riċerkaturi u individwi li jaħdmu fil-qasam tal-infrastruttura tal-ispazju tlaqqgħu flimkien mill-Kunsill Malti għax-Xjenza u t-Teknoloġija – l-MCST – biex jaqsmu r-riżultati tar-riċerka tagħhom li minnhom qed tibbenefika s-soċjetà.
Preżenti kien hemm ukoll esperti mill-Aġenzija Spazjali Ewropea, li hija organizzazzjoni intergovernattiva ddedikata għall-iżvilupp tal-kapaċitajiet tal-Ewropea fil-qasam tal-ispazju, u li fiha tnejn u għoxrin pajjiż Ewropej. Malta mhix membru tal-Aġenzija iżda tikkollabora mill-qrib ħafna magħha.
Id-Direttriċi tal-Istrateġija, ir-Riċerka u l-Affarijiet Tekniċi tal-MCST, Ruth DeBrincat, ikkummentat li d-diversi riċerkaturi preżenti setgħu jiddiskutu d-diversità tar-riċerka li ssir f’dan il-qasam.
Qalet, “L-MCST għandu l-għan li jippromwovi iktar riċerka fuq l-ispazju, kif ukoll ninvestu fil-capabilities u fil-capacity tar-riċerkaturi tagħna u l-infrastruttura li tintuża biex issir ir-riċerka’’
Il-Kunsill Malti għax-Xjenza u t -Teknoloġija ilu għal dawn l-aħħar ħames snin jiffinanzja r-riċerka spazjali.
Eżempji ta’ proġetti fl-ispazju li ngħataw fondi mill-MCST jinkludu kif wieħed jista’ juża modi ta’ ssensjar mill-bogħod sabiex isir monitoraġġ tal-movimenti fil-qigħan tal-bajjiet żgħar Maltin. Proġetti ta’ ricerka oħrajn jinkludu l-evalwazzjoni ta’ ritratti mis-satellita biex jistudjaw it-tibdil u l-użu tal-ilma fl-għelieqi użati għall-biedja u l-użu ta’ ritratti multispettrali sabiex jiġu stmati l-parametri tal-kulur tal-baħar fiż-żoni kostali Maltin f’dettal mirqum ħafna li qatt ma seta’ jsir qabel.
Anke s-settur pubbliku jagħmel użu sinjifikanti mir-riċerka spazjali.
Preżenti għad-diskussjonijiet organizzati mill-MCST kien hemm ukoll id-Direttur tad-Dipartiment tax-Xjenza, l-Applikazzjonijiet, u t-Teknoloġiji Futuri tal-Aġenzija Spazjali Ewropea, Gordon Campbell.
Huwa tkellem b’mod partikolari dwar kif is-settur pubbliku qed jagħmel dejjem iżjed użu minn dejta satellitari biex jissorvelja oqsma bħall-ambjent, it-trasport, u l-baħar, u qal li hemm diversi setturi li fihom l-Aġenzija Spazjali Ewropea hija impenjata li tgħin lil Malta.
Stqarr, “Things have to be monitored as part of Malta’s commitment for European environment and protection regulations and what we’re seeing is the government agencies that actually have to do that monitoring increasingly wanting to use satellite data.’’
Ir-rappreżentanti tal-Aġenzija Spazjali Ewropea qalu li, bil-parteċipazzjoni fl-attivitajiet spazjali, il-gvern ta’ Malta qed jinvesti fil-futur tal-pajjiż.
