Il-kunjom Boxall marbut ħafna mal-Kunsilli Lokali u llum il-ġurnata aktar minn qatt qabel. Il-ġurnata tat-tmienja ta’ Ġunju firxet it-tapit l-aħmar għad-dħul fl-arena politika ta’ Karl Boxall, iben is-sindku tal-Birgu John Boxall. Is-Sibt li għadda, il-verdett tal-Ġirbin u l-Għaxqin eleġġihom bħala sindki rispettivi.
Bi tletin sena esperjenza, John Boxall rawwem f’ibnu s-sens ta’ altruiżmu lejn ħaddieħor, l-irġulija ma’ kulħadd u ħidma ħawtiela b’risq il-komunità u niesha.
Tlabna lis-Sinjura Rita Boxall tistqarr magħna xi jfisser għaliha s-suċċess ta’ żewgha u binha, fl-elezzjoni tas-Sibt li għadda.
“Is-suċċess speċjalment ta’ Karl ħadt ferħa kbira għax Karl ma stennejtux ħa joħroġ għall-kunsill, u tela’ hekk. Imma ferħana ħafna għalih. Kont ngħidlu minjaf kemm se ssib xogħol. Ferħana wkoll għal żewġi, għax żewġi ilu u kuntenta bih u naf kemm jaħdem. Naf kemm jagħmel xogħol. Jien inbati ħafna ma’ John imma kuntenta bih, u grazzi n-nies tal-Birgu u grazzi lin-nies ta’ Ħal Għaxaq tal-fiduċja li taw lil Karl.”
Rita Boxall – mart John u omm Karl
Is-Sindku tal-Birgu, għal ftit inqas minn tletin sena, ma naqasx li jagħti parir lil ibnu Karl, issa li huwa s-sindku ġdid ta’ Ħal Għaxaq.
“Biex tagħmel lokalità aħjar milli hi, li llum kibret, trid tagħmilha ħafna aħjar milli hi, trid taqdef u tpoġġi lin-nies fuq quddiem nett fl-aġenda tiegħu. Jekk tagħmel lin-nies fuq quddiem nett u ma tarax lin-nies fl-elezzjoni biss imma tismagħhom, huma jagħmluhielek l-aġenda tiegħek.”
John Boxall – Sindku tal-Birgu
Is-Sinjura Boxall ma naqsitx li tgħarrfilna wkoll il-prinċipji, li hi u l-familja Boxall iħaddnu bħala filosofija tal-familja tagħhom.
“Aħna għedna llum hemm u għada m’aħniex, la għandna blu u lanqas aħmar, la għandna San Duminku u lanqas San Lawrenz. Dan il-parir tajtu lil Karl. Għedtlu imxi fuq il-passi ta’ missierek, tarax kuluri u tħarisx lejn uċuħ tan-nies biex inti jsiru jħobbuk in-nies kif iħobbu lil missierek.”
Rita Boxall – mart John u omm Karl
Lejlet Jum il-Missier, is-Sindku l-ġdid ta’ Ħal Għaxaq qasam magħna l-ħsibijiet tiegħu dwar l-għażiż missieru, li żgur li żera’ fih żerriegħa ta’ mħabba lejn għajru, li se tissarraf f’ġid għal-lokalità li se jkun qed imexxi, flimkien ma’ oħrajn; ir-raħal ta’ Ħal Għaxaq.
“Missieri jfisser ħafna għalija. Tista timmaġina jien x’infisser għalih. Żewġ karattri naqra, tal-istess ras. Ifisser raġel, dejjem rasu fuq għonqu u dejjem mexa kif suppost. Irrid naħdem bl-ideat kbar li jista jtini missieri għax jekk ma jagħtihomlix missieri ma jista jagħtihomli ħadd. Nimxi fuq il-passi tiegħu li m’hemm aħmar u lanqas blu u dik imxejt biha t-triq kollha u r-residenti jafu li mxejt magħhom hekk għax jekk huma għaxqin, huma ta’ Ħal Għaxaq.”
Karl Boxall – Sindku ta’ Ħal Għaxaq
