Il-kanzunetta popolari tal-Milied, ‘Last Christmas’ tad-duo Wham!, għall-ewwel darba tinsab fil-quċċata tal-klassifika tal-kanzunetti fir-Renju Unit f’jum il-Milied, wara disgħa u tletin sena.
Din il-kanzunetta ħarġet fl-elf disa’ mija u erbgħa u tmenin (1984), meta ħarġet ukoll il-kanzunetta ‘Do They Know It’s Christmas?’ ta’ Band Aid, li rat l-aqwa kantanti ta’ dik l-epoka jingħaqdu flimkien għal kanzunetta favur il-paċi.
Fl-aħħar ġimgħa, il-kanzunetta ‘Last Christmas’ ta’ Wham! – minn George Michael u Andrew Ridgeley – indaqqet għal aktar minn tlettax-il miljun darba.
Mal-midja internazzjonali, Ridgeley qal li x-xewqa ta’ George Michael kienet li bil-kanzunetta Last Christmas jikseb post fil-quċċata tal-klassifika, u din ix-xewqa saret realtà wara dawn is-snin kollha.
