Kif jiġri ta’ kull nhar ta’ Tlieta, jiltaqa’ l-kabinett, iżda llum b’differenza, għaliex dan qed isir fl-iskola Primarja tal-Fgura.
Din hija opportunità fejn is-sindki u numru ta’ Kunsilliera jsemmgħu leħinhom.
Lokalitajiet li fil-passat kienu minsija, issa saru ċentri ta’ attivita’ kbira. Iżda hemm sentiment komuni fost is-sindki li qed iħossu li qed isiru vittmi tas-suċċess tagħhom stess.
L-infurzar kontra abbuzi ta’ skart, problema ta’ parkeġġ, flimkien mal-problema tat-traffiku huma problemi komuni li ssemmew minn kull Sindku.
Matul din il-laqgħa, s-Sindku tal-Fgura Byron Camilleri irrefera għall-għeluq tal-powerstation u li t-trab iswed li kien jipproduċi dan l-impjant huwa ħaġa tal-passat. Fl-intervent tiegħu huwa faħħar it-titjib fit-trasport pubbliku u spjega li l-ilmenti naqsu. Camilleri ħeġġeġ biex issir konsultazzjoni dwar il-problemi tat-traffiku, sabiex ikun jista’ jsir pjannar aħjar tat-toroq. Spjega li huwa minnu nniffsu messaġġ li din il-laqgħa såret il-Fgura, dan għaliex għalkemm saru numru ta’ proġetti f’irħula oħra fin-Nofsinhar ta’ Malta, il-Fgura xorta ma ntesietx.
Is-Sindki preżenti għamlu referenza għall-ġid li qed isir fin-Nofsinhar ta’ Malta, permezz tal-proġetti ta’ riġenerazzjoni f’ Marsaxlokk, Raħal Ġdid, L-Isla, l-Birgu, Bormla u f’Marsaskala.
Fis-suġġerimenti tagħhom, is-Sindki, appellaw għall-bidla fl-allokazzjoni tal-fondi, issuġġerew li jkun hemm forma ta’ introjtu ieħor għall-Kunsilli Lokali biex ma jibqgħux dipendenti biss fuq il-fondi li jtihom il-Gvern Ċentrali.
Il-Prim Ministru Joseph Muscat spjega li fl-aħħar snin il-Kunsilli Lokali ħadu rwol infrastrutturali filwaqt li esprima x-xewqa tiegħu li jara l-Kunsilli jinvolvu ruħhom iktar fil-qasam ekonomiku u soċjali tal-lokalita’. B’referenza għall-appell li għamlu s-Sindki dwar l-allokazzjoni tal-fondi, il-Prim Ministru spjega li din is-sitwazzjoni mhix waħda faċli.
“Fil-passat kien hemm problemi ta’ nuqqas ta’ ppjanar fit-tul, fejn Kunsilli spiċċaw bla flus għal snin wara li għamlu t-toroq.”
Huwa stqarr li jinsab sodisfatt li l-Kunsilli qed iħossu d-differenza permezz tal-proġetti tar-rinovazzjoni u li dawn qed iwasslu għal qawmien ekonomiku fin-naħa t’isfel tal-pajjiż li qed igawdu minnhom in-nies. “Il-problemi mhumiex frott it-telqa, imma frott ir-riġenerazzjoni ekonomika.”
Dan qed jikkoreġi l-problemi tal-passat, fejn dawn il-postijiet intelqu. Il-Prim Ministru stqarr li dan qed iwassal għall-isfidi msemmija ghax mhux ilaħħqu mal-ammont ta’ nies li issa qes iżuru dawn il-lokalitajiet. Fakkar li iktar ma jkun hemm attivita’ ekonomika iktar ħa jiżdiedu dawn il-problemi u li l-Gvern qed iżommhom f’moħħu.
Rigward l-LESA qal li għaddejjin taħdidiet mal-Kunsilli Lokali u spjega li din mhux se tkun sistema ta’ one size fits all. Sostna li kull lokalita’ se jkollha sistema differenti skont il-bżonnijiet partikolari. Il-frott ta din ir-riforma se tinħass fix-xhur li ġejjin.
Il-Prim Ministru, sodisfatt li t-trasport pubbliku ma ssemmiex għax dan ifisser li l-problemi qed jonqsu u s-sistema qed titjieb.
Għamel referenza partikolari għal-lokalita’ tal-Marsa u l-immigranti li hemm fil-lokalita’. M’għadux tolleranti li l-immigranti jkunu sfruttati. Ammetta li mhemmx biżżejjed infurzar u li se tinġibed l-attenzjoni biex dan jiżdied.
Ritratt: DOI Jeremy Wonnacott
