L-eks captain u plejer ta’ Manchester United Gary Neville f’messaġġ fuq il-midja soċjali qal li la tgħaddi l-pandemija tal-Coronavirus, l-ewwel vjaġġ tiegħu se jkun lejn Malta. F’dan il-messaġġ, Neville qal li bħalissa d-dinja kollha għaddejja minn mument diffiċli u rringrazzja lit-tobba u l-istaff mediku li qed jiġġieldu din il-pandemija. L-eks plejer ta’ United appella sabiex kulħadd isegwi l-pariri li jingħataw mill-awtorijiet tas-saħħa sabiex tonqos l-imxija ta’ dan il-virus.
F’dan il-messaġġ, Gary Neville qal kif huwa ilu jżur lil pajjiżna għal dawn l-aħħar 27 sena. L-ewwel darba li żar lil Malta kien meta kellu tmintax-il sena, flimkien mal-eks plejer tar-Red Devils David Beckham u ħbieb oħra. Qal li minn dakinhar huwa baqa’ jżur lill-pajjiżna sena wara oħra minħabba l-ospitalità u l-ġenerożità tal-poplu Malti.
