Bosta plejers u dilettanti tal-logħba tal-futbol f’Malta jinsabu inkoralati wara li f’laqgħa tal-Istanding Committee tal-clubs tal-Premier, il-maġġoranza assoluta tar-rappreżentanti tal-clubs tal-Premier ivvotaw favur li mill-istaġun li ġej, ikunu jistgħu jużaw 11-il barranin minn total ta’ 18-il plejer.
Dan il-vot wassal għal reazzjoni ta’ bosta fosthom tal-goalkeeper Omar Borg li ilu jilgħab fil-kampjonat Malti għal dawn l-aħħar 20 sena.
Sostna li deċiżjoni bħal din tista’ ġġib fix-xejn il-ħolma ta’ plejers żgħar biex jilagħbu fl-ogħla livelli tal-futbol Malti.
Qiegħdin noqtlu l-ħolma tat-tfal tagħna u tal-ġenituri tagħhom li xi darba jilagħbu Ta’ Qali … xi darba jilgħabu fuq il-ħaxix.
Is-Sur Borg stqarr li minkejja li hemm opportunità żgħira ta’ plejers Maltin li l-ħiliet tagħhom jiggarantulhom post fil-premier, iħoss li m’għadhiex biss kompetizzjoni ta’ ħiliet iżda waħda ta’ kemm se tlaħħaq in-nefqa biex klabb iżomm plejer irreġistrat taħt ismu.
Ix-xenarju tal-llum mhix kompetizzjoni ta’ min hu l-aqwa. ikolli nghid li l-barranin li qed jiġu llum mhumiex ta’ livell li kellna ħamsa, sitta, seba snin ilu jew għoxrin sena ilu. dawn ikunu plejers ġejjin minn klabbs oħra fl-Ewropa, jkunu waslu fl-aħħar tat-transfer market u jkunu jridu jsibu timijiet biex ma jitilfuhomx u jissostanzjawhom lil timijet Maltin – allura t-tim Malti ma jħallas xejn.
Stqarr li b’differenza mill-plejers barranin li jaraw minn Malta biss opportunità finanzjarja, il-plejers Maltin li trawmu sa minn ċkunithom biex jilagħbu bi qlubija għat-timijiet Maltin, dejjem baqgħu iżommu għall-qalbhom il-klabbs tagħhom anke fl-iżjed mumenti diffiċli.
Ma tagħmilx sens, il-problemi li jaffaċjaw il-klabbs bil-barranin – lodging, pagi, transport, mal-Maltin sa fejn naf jien il-klabbs b’xi mod jew ieħor waslu. kull klabb li kellu problema finanzjarja poġġa mal-plejers maltin, irranġaw l-affarijiet għall ġid tal-klabb biex jibqa għaddej, għax fl-aħħar mill-aħħar il-klabb huwa mportanti għall-plejer … imma l-klabb mingħajr il-plejer mhu xejn.
Min-naħa l-oħra, uffiċjal ta’ klabb li vvota favur din il-proposta stqarr li din saret wara l-clubs mhux qed isibu biżżejjed talent Malti. Qal li dan wassal biex il-plejer stabbilit beda jgħolli u jirrikatta lill-clubs speċjalment tal-Premier. Waqt li rrikonoxxa li din id-deċiżjoni tista’ twassal biex it-tfal tan-nursuries jitilfu ċ-ċans li jilagħbu fil-premier, qal li l-influss tal-plejers barranin jista’ jfisser stabilizzazzjoni tal-pagi tal-plejers.
Minkejja kollox sostna li fl-aħħar mill-aħħar id-deċiżjoni għad irid jeħodha l-kunsill tal-MFA u fi kliemu mhux faċli li tgħaddi għax l-interessi tal-MFA u tal-clubs mhumiex l-istess.
