Is-sostenibbiltà qiegħed f’qalbhom u fil-prodott tagħhom. Hekk saħaq magħna Adam Borg Mercieca, fundatur ta’ Filacorp, l-unika kumpanija Maltija li tagħmel il-filament għall-istampar ta’ oġġetti 3D.
Din il-kumpanija, li bdiet fl-2023, tispeċjalizza wkoll f’materjal sostenibbli, ta’ teknoloġija għolja u riċiklat.
Bħalissa, din il-kumpanija tħaddem erba’ persuni.
Ma’ din il-kamra tal-aħbarijiet, Borg Mercieca spjegalna r-rwol li għandha l-kumpanija għal din l-industrija emerġenti, li diġà qed taqbad sew fostna wkoll.
“Filcorp tagħmel 3D printing filaments magħmul minn plastik riċiklat 100%. Bażikament aħna l-iskop tagħna hu li naqbdu l-prodott minn barra li jkun riċiklat bil-lest, jiġi għandna, aħna naħdmuh, ngħadduh minn ġol-magna u nagħmlu l-finished product hawn Malta stess fejn, imbagħad, jinbiegħ Malta għal klijenti differenti … imbagħad nesportawh barra minn Malta.”
Adam Borg Mercieca, Fundatur, Filacorp
Fil-fatt, Borg Mercieca saħaq li, minkejja li l-akbar klijent tagħhom hi Malta stess, pajjiżi oħrajn minn madwar l-Ewropa qegħdin ifittxu wkoll il-prodott tagħhom.
“Barra minn Malta bdejna bil-mod nesportaw lejn Spanja kif ukoll il-Portugall, u wkoll se nibdew nesportaw issa lejn l-Italja u r-Rumanija.”
Adam Borg Mercieca, Fundatur, Filacorp
Magħna spjega li għandhom partnership l-Italja, fejn, hemmhekk, jinġabar il-plastik mill-baħar u materjal ieħor post-industrijali biex f’Malta dan jitnaddaf u jkun jista’ jerġa’ jintuża.
Kien hawn fejn spjegalna d-differenza fit-tip tal-plastik li jużaw.
“Wieħed minnhom huwa PLA, li hi l-iktar filament komuni fit-3D printing industry. Dan hu magħmul minn tazzi tal-plastik li jintużaw, fost oħrajn, għall-parties jew food packaging jew film – dawn li jiġu riċiklati għall-PLA, u l-PLA tagħna 100% magħmul minnhom, imbagħad li għandna PETG li għadna kif nidejnieh illum. Il-PETG, li hu magħmul minn 50% fliexken riċiklati li jinġabru mill-baħar u l-50% l-oħra hu virgin PETG, għax hu nnifsu ma jistax jiġi rriċiklat.”
Adam Borg Mercieca, Fundatur, Filacorp
Fl-aħħarnett, hu spjega magħna li, ’il quddiem, qed jaraw li l-kumpanija ddaħħal aktar prodotti riċiklati li jistgħu jintużaw għat-3D printing, bil-mira li jkunu aktar sostenibbli fil-prodott tagħhom.
