Il-Gvern Ungeriż qed jirtira mill-Qorti Kriminiali Internazzjonali, l-ICC.
Dan tħabbar minn uffiċjal imlaħħaq fl-uffiċju tal-Prim Ministru Victor Orban ftit sigħat qabel il-mexxej Iżraeljan Benjamin Netanyahu, li huwa mfittex b’mandat ta’ arrest mill-ICC, jasal l-Ungerija għal żjara statali.
Orban kien ħareġ l-istedina għal Netanyahu ftit wara li kien ippublikat il-mandat tal-arrest f’Novembru li għadda, hekk kif kien qal li din id-deċiżjoni ma kien se jkollha l-ebda impatt f’pajjiżu.
F’Novembru, l-imħallfin tal-Qorti Kriminali Internazzjonali, qalu li kienu sabu bażi raġonevoli li Netanyahu kellu responsabbiltà kriminali għall-allegati delitti tal-gwerra u delitti kontra l-umanità matul il-gwerra bejn Iżrael u l-Hamas b’Netanyahu jiddikjara li d-deċiżjoni tal-ICC kienet waħda antisemitika.
L-ICC, li hija qorti dinjija, għandha l-awtorità li tipproċessa lil dawk akkużati b’ġenoċidju, delitti kontra l-umanità u delitti tal-gwerra.
L-Ungerija hija waħda mill-fundaturi tal-ICC li tikkonsisti f’125 stat membru u hija l-ewwel nazzjon fl-Unjoni Ewropea li se tkun qed toħroġ minn din l-organizzazzjoni.
L-Istati Uniti, r-Russja, Ċina u l-Korea ta’ Fuq huma fost in-nazzjonijiet li ma jiffurmawx parti mill-ICC u għalhekk m’għandiex ġurisdikazzjoni fuqhom.
Għalkemm Iżrael ukoll ma jiffurmax parti minn dan it-trattat, fl-2021 l-ICC kienet iddikjarat li għandha ġurisdikazzjoni fuq l-okkupazzjoni tax-Xatt tal-Punent, Ġerusalemm tal-Lvant u Gaza għax is-Segretarju Ġenerali tal-Ġnus Magħquda kien aċċetta li l-Palestinjani kienu membri.
