Il-Kumitat Ornis ivvota b’maġġoranza favur il-proposti tal-Federazzjoni Kaċċaturi Nassaba Konservazzjonisti, l-FKNK, biex l-istaġun tal-kaċċa fir-rebbiegħa, flimkien mal-proġett tar-riċerka tal-gamiem, permez tal-insib tradizzjonali kkundizzjonat, għal din is-sena jiftaħ mill-21 ta’ April sal-4 ta’ Mejju li ġejjin.
L-Ornis qabel ukoll li l-istaġun għandu jkollu limitu nazzjonali ta’ mhux iżjed minn 1,500 gamiema.
Dawn ir-rakkomandazzjonijiet issa se jsiru lill-Ministru responsabbli Clint Camilleri.
L-istaġun tal-kaċċa fir-rebbiegħa kien f’riskju wara li l-għaqda Birdlife għamlet mandat biex l-Ornis ma jiddiskutiex il-proposti biex jerġa’ jinfetaħ il-perjodu li fih jiġi pprattikat dan id-delizzju ta’ eluf ta’ Maltin u Għawdxin.
Minkejja dan, il-mandat ġie rrifjutat mill-Imħallef Ian Spiteri Bailey li ddikjara li wieħed m’għandux jippretendi li jitwaqqaf vot demokratiku sempliċiment għax jantiċipa li dan mhux se jkun kif jixtieq hu.
Minħabba restrizzjoni ta’ ħin, il-proposti tal-FKNK dwar il-kaċċa minn fuq il-baħar, regolamenti dwar il-bird ringing u r-reviżjoni ta’ ċerti multi u pieni, b’mod partikolari, dik drakonjana ta’ revoka ta’ liċenzja permanenti, ġew differiti għal-laqgħa li jmiss tal-Kumitat Ornis.
Fi stqarrija, l-FKNK irringrazzjat lill-Gvern, partikolarment lill-Ministru Camilleri, l-għerf tal-qorti lokali u l-membri leali tal-FKNK għall-fehma u l-appoġġ kontinwu tagħhom tat-tradizzjonijiet soċjo-kulturali lokali tal-kaċċa u l-insib u kwistjonijiet relatati.
