Minn stħarrig li għamel il-ġurnal l-ORIZZONT jirriżulta li d-dokumenti li saret referenza għalihom mill-blogger Daphne Caruana Galizia, u warajha mill-Kap tal-Partit Nazzjonalista Simon Busuttil, inkitbu fi żmien meta Manfred Galdes kien imexxi l-FIAU – it-taqsima awtonoma li tanalizza s-settur finanzjarju bil-poteri li tinvestiga.
Manfred Galdes irriżenja minn chairman tal-FIAU fil-bidu tas-sajf tas-sena li għaddiet. Ir-rapport tal-Orizzont jgħid li għalkemm Manfred Galdes ħalla lil min jinqeda bir-riżenja tiegħu u jabbinaha mal-Panama Papers li ħargu xhur qabel, daqslikieku Galdes telaq għax ghamel rapporti li ma ġewx segwiti mill-Pulizija, is-sekwenza tal-ġrajjiet turi mod iehor.
Jirriżulta li Manfred Galdes telaq mill-FIAU wara li sar magħruf li kien diga’ innegozja ma’ kumpanija privata biex jingħaqad magħha. Il-kumpanija ARQ Group daħlet biex issegwi eżerċizzju ta’ compliance ta’ bank lokali. Meta kien għadu fl-FIAU, Manfred Galdes kien diġa’ qed jiġi indikat bħala konsulent tal-kumpanija ARQ u kien propju meta sar magħruf dak li kien qiegħed jinħema, li Manfred Galdes irriżenja mill-FIAU.
Ir-rapport tal-Orizzont jgħid li huwa etikament inaċċettabbli li uffiċjal jitlaq minn pożizzjoni biex jieħu pożizzjoni oħra ma’ kumpanija li potenzjalment setgħet tkun investigata mill-istess uffiċjal. Ir-rapport tal-Orizzont jgħid li dan jitfa’ dell ikrah fuq l-integrità tal-investigazzjonijiet li seta’ mexxa l-uffiċjal – jew l-entità tiegħu.
Agħar minn hekk, isostni r-rapport tal-Orizzont, il-kumpanija ARQ Group – li Manfred Galdes spicca direttur tagħha wara li telaq mill-FIAU, tinkludi fiha ARQ Fiduciaries li hija liċenzjata mill-Awtorità Għas-Servizzi Finanzjarji biex taċċetta trustee bħal dawk li ssemmew fil-Panama Papers.
Skont ir-rapport tal-Orizzont, ARQ Fiduciaries issemmiet fil-Panama Papers ukoll bħala l-intermedjarja ta’ Fashai Limited, kumpanija li kienet inkorporata f’Jannar tal-2011 u ntemmet f’Ottobru ta’ erba’ snin wara – jiġifieri f’Ottobru tal-2015. Minn stħarrig li għamel l-Orizzont, jirriżulta li Fashai Limited kienet irreġistrata fil-British Virgin Islands.
Għalkemm Manfred Galdes kien investiga nies li ssemmew fil-Panama Papers – mill-istħarrig li għamel l-Orizzont – ma jirriżultax li saru investigazzjonijiet minn Manfred Galdes fuq il-kumpanija ARQ li tagħha wara spiċċa direttur. Lanqas jirriżulta li saret xi investigazzjoni dwar kumpaniji Maltin imsemmija fil-Panama Papers. L-Orizzont jgħid li Manfred Galdes għamel rapporti fuq Konrad Mizzi, Keith Schembri u Brian Tonna. L-Orizzont iżid jgħid li l-aħħar rapport mexxih jumejn biss qabel telaq mill-FIAU.
Fi tmiem ir-rapport, l-Orizzont jiżvela li jeżistu komunikazzjonijiet li Manfred Galdes kellu ma’ nies fil-politika fl-istess zmien li kienu ħerġin il-Panama Papers.
Ritratt: Ivan Camilleri f’battuta ma’ Manfred Galdes meta kien hemm il-Pana Committee.
