L-Awtorità għall-Ambjent u r-Riżorsi, L-ERA, qalet li l-ordni ta’ waqfien u infurzar li ħarġet f’Novembru li għadda fuq ix-xogħlijiet li qed isiru f’Wied Qirda, ma kinitx maħsuba biex twaqqaf xogħlijiet li huma permessi bil-liġi.
Fix-xhur li għaddew, Infrastruttura Malta bdiet xogħol biex issewwi triq f’Wied Qirda biex terġa’ tkun sigura għall-pubbliku.
Fi stqarrija konġunta bejn iż-żewġ entitajiet, l-ERA qalet li l-ordni ħarġet biex tkun infurmata fuq il-metodoloġija tax-xogħlijiet u sabiex tiżgura li jkun hemm l-inqas impatt fuq l-ambjent tal-inħawi.
L-istqarrija żżid tgħid li l-Awtorità ħarġet l-ordni biex taċċerta li kull xogħol f’dawn l-inħawi jitwettaq skont il-pjan approvat, u li l-kuntratturi japprezzaw l-importanza ekoloġika ta’ din iż-żona.
Qalet li wara li ħarġet l-Ordni ta’ Infurzar, il-kuntratturi tal-aġenzija neħħew l-asfalt minn medda ta’ art ta’ madwar 70 metru kwadru lil hinn mill-wisgħa tat-triq oriġinali.
L-ERA żiedet li fil-jiem li ġejjin se jibdew xogħlijiet ta’ bini mill-ġdid tas-sisien tat-triq u ta’ ħitan tas-sejjieħ li ġġarrfu kawża ta’ trakk li nqaleb fl-istess wied.
L-Awtorità qalet li se tevalwa l-intervent sħiħ li se jsir u se tipproponi aktar miżuri ta’ protezzjoni.
Qalet li meta jitlesta x-xogħol se tkompli ssegwi dawn l-inħawi biex tassigura li l-wied reġa’ lura għall-istat naturali tiegħu.
