“L-andament fin-negozju fl-aħħar tas-sena kien aħjar milli konna qed nistennew.”
Dan kien is-sentiment tal-President tal-Assoċjazzjoni Maltija għas-Sidien tar-Ristoranti u l-Lukandiera Tony Zahra f’intervista ma’ ONE News hekk kif din il-kamra tal-aħbarijiet stħarrġet l-andament tan-negozju f’dan il-qasam fil-jiem tal-festi.
Dan flimkien mal-impatt li seta’ kellha s-sitwazzjoni tal-Covid-19 f’pajjiżna hekk kif żdiedu l-każijiet ta’ infezzjonijiet.
Ma’ ONE News is-Sur Zahra qal hekk.
Qal, “New Year kien aħjar kemm fil-lukandi u kemm fir-ristoranti. Il-Maltin ukoll ipparteċipaw ħafna fin-New Year u allura kien aħjar milli konnha qed nistennew wara li faqqgħet l-Omicron.”
Madankollu s-Sur Zahra xorta spjega li n-numri għadhom ’il bogħod minn dawk tal-2019, li hija meqjusa bħala l-aqwa sena tat-turiżmu f’pajjiżna.
Minkejja dan s-Sur Zahra tenna kif meta wieħed iqabbel mal-2020, kien hemm aktar attività tan-negozju.
Spjega, “Meta tikkumpara mas-sena l-oħra ma’ tal-2020 allura naħseb li konnha l-istess jew daqxejn aħjar.”
Huwa aċċenna wkoll għall-għajnuna tal-Covid Wage Supplement li l-Gvern reġa’ estenda sal-aħħar ta’ Jannar sabiex ikompli jsostni dawk in-negozji l-aktar milquta mill-pandemija.
Filwaqt li esprima s-sodisfazzjon tiegħu għal dan, Tony Zahra tenna li diġà bdew id-diskussjonijiet mal-Gvern.
Qal, “S’issa għandna l-Wage Supplement li ġie estiż sal-aħħar ta’ Jannar. Aħna diġà bdejna nitkellmu mal-Gvern għax jidrilna li frar se jkun ukoll xahar li se jkun daqxejn diffiċli jekk mhux ħafna diffiċli biex inżommu l-wage supplement għaddejja sal-aħħar ta’ Frar.”
Intant ONE News stħarreġ ukoll is-sitwazzjoni fil-gżira Għawdxija mal-Kap Eżekuttiv tal-Assoċjazzjoni tat-Turiżmu Għawdxija, is-Sur Joe Muscat.
Mistqosi dwar l-andament f’Għawdex, is-Sur Muscat tenna li n-negozju mexxa aktar mis-sena li għaddiet minkejja ż-żidiet fil-pandemija.
Qal, “Bħala andament turistiku f’Għawdex matul il-perjodu tal-Milied u l-ewwel tas-sena nistgħu ngħidu li kien aħjar mis-sena l-oħra minkejja l-fatt li kellna numru għoljin ta’ infezzjonijiet li bdejna naraw telgħin fil-ġranet ta’ qabel il-Milied.”
Hawn ukoll is-Sur Muscat tenna li wkoll kien hemm ħafna kanċellazzjonijiet f’lukandi u postijiet ta’ akkomodazzjoni. Madankollu dawn għamlu tajjeb għalihom il-Maltin minkejja li ma’ qattgħux iljieli daqs kemm is-soltu jqattgħu l-barranin.
Qal, “Ħafna Maltin mhux qed isiefru bħas soltu f’dawn il-vaganzi allura l-alternattiva naturali tagħhom sabiex jieħdu l-holiday tagħhom hija bażikament Għawdex. B’hekk il-kanċellamenti tas-suq barranin kienu qed ikunu mimliha anke mill-Maltin.”
