L-Oppożizzjoni mhux taqbel u ħaditha kontra r-rakkomandazzjoni tal-Ispeaker tal-Parlament, li quddiem il-Kumitat Parlamentari għall-Istandards fil-Ħajja Pubblika jitla’ jixhed il-Kummissarju tat-Taxxa dwar ir-rapport tal-Kummissarju għall-Istandards fil-Ħajja Pubblika George Hyzler fuq Rosianne Cutajar.
Fil-bidu tas-seduta tal-Erbgħa waranofsinhar, l-Ispeaker tal-Parlament Dr Anġlu Farrugia għamel dikjarazzjoni fejn nnota dak li ġara fil-jum tat-Tlieta fil-laqgħa tal-Kumitat Parlamentari inkwistjoni fejn spjega kif fil-Kumitat ma kienx hemm qbil dwar min għandu jitla’ jixhed dwar ir-rapport ta’ Hyzler fuq Rosianne Cutajar.
In-naħa tal-Gvern qablet li waqt id-diskussjoni tar-rapport ta’ George Hyzler għandu jitla’ jixhed il-Kummissarju tat-Taxxa iżda l-Oppożizzjoni ma riditx dan u riedet li jerġgħu jitilgħu jixhdu persuni oħra li diġà xehdu quddiem Hyzler.
L-Ispeaker saħaq li huwa kien kostrett jissospendi l-laqgħa fl-isfond tal-għajjat u anki f’mument minnhom, il-membri tal-Kumitat irrikorrew għall-użu tal-kworum fil-plenarja.
L-Ispeaker tal-Parlament qal li dan mhux il-mod kif titmexxa diskussjoni b’mod ċivili.
Saħaq li huwa xorta se jipprova jlaqqa’ l-membri tal-Kumitat biex jintlaħaq qbil dwar kif għandu jipproċedi l-istess Kumitat dwar ir-rapport inkwistjoni.
L-Ispeaker tal-Parlament qal li huwa jrid ċertezza u mhux probabiltà jekk id-Deputata Rosianne Cutajar ħaditx flus f’senserija fuq xiri ta’ proprjetà.
Dan qalu fl-isfond li t-Tnejn filgħaxija, f’laqgħa oħra tal-Kumitat Parlamentari għall-Istandards fil-Ħajja Pubblika, il-Kummissarju għall-Istandards fil-Ħajja Pubblika George Hyzler saħaq li mhux ċert li Rosianne Cutajar ħadet flus f’senserija dwar xiri ta’ proprjetà fl-Imdina minn Yorgen Fenech.
Mistoqsi mill-Whip tal-Gvern Glenn Bedingfield, Hyzler tkellem fuq probabbiltà u mhux ċertezza.
Huwa stqarr: “Illum użajt il-kelma, probabbli li ħadithom jiġifieri jista’ jkun li ma ħadithomx, mintix ċert.”
Il-Kummissarju George Hyzler: “Jiena qatt ma nista’ nkun ċert sakemm ma jkunx hemm ammissjoni, ammissjoni.”
Intant fl-aħħar jiem ukoll, Charles Farrugia kiteb lill-Ispeaker fejn iddikjara li kien hu li ħa l-flus f’senserija u mhux Rosianne Cutajar.
