Minn Jannar sa April ta’ din is-sena, l-Awtorità għas-Saħħa u s-Sigurtà fuq il-post tax-xogħol, l-OHSA, wettqet kważi 5,000 spezzjoni fuq postijiet tax-xogħol.
Dan tħabbar fil-Parlament mill-Ministru għall-Ġustizzja u r-Riforma fis-Settur tal-Kostruzzjoni, Jonathan Attard, hekk kif ġie diskuss ir-rapport annwali tal-OHSA.
F’April li għadda, biss, kien hemm aktar minn 1,500 spezzjoni.
Is-sena l-oħra, l-OHSA wettqet rekord ta’ aktar minn 9,380 spezzjoni fuq il-postijiet tax-xogħol.
Il-Ministru spjega li, fl-2024, l-OHSA ħarġet 980 avviż għal titjib, 543 multa amministrattiva u 331 ordni ta’ waqfien.
Fl-istess waqt, innota kif, is-sena l-oħra, kien hemm l-inqas rata ta’ mwiet fuq il-post tax-xogħol.
“L-aktar ħaġa importanti, madankollu, kien il-fatt li rajna tnaqqis sinifikanti fl-imwiet fuq il-post tax-xogħol, minn erbgħa għal kull 100,000 ħaddiem fl-2022 għal 1.2 għal kull 100,000 fl-2024 … l-aktar rata baxxa f’dawn l-aħħar snin.”
Il-Ministru Jonathan Attard
Hawnhekk il-Ministru Attard semma kif saru spezzjonijiet differenti, fosthom f’pompi tal-petrol u anke f’kumpaniji farmaċewtiċi.
Semma wkoll il-ftuħ tal-uffiċċju tal-awtorità fil-gżira Għawdxija, fejn s’issa, wara ftit ġranet, diġà saru 150 spezzjoni f’diversi setturi.
Il-Ministru Attard qal kif, is-sena l-oħra, kien hemm l-introduzzjoni tal-helpline 138, waqt li, aktar kmieni din is-sena, tnieda r-Reġistru tal-Persuni Kompetenti, li jfisser li kull sit ta’ kostruzzjoni se jkun taħt il-ħarsien ta’ esperti fis-saħħa u s-sigurtà, li huma rreġistrati mal-awtorità.
“Se nkunu qed inkomplu ndaħħlu aktar standards għoljin bis-saħħa ta’ din il-liġi fix-xhur li ġejjin, fosthom ir-reġistru pubbliku ta’ min ikun wettaq offiża. Nerġa’ nirreferi għal-liġi li, minn din is-sena, bdiet tippermetti penali amministrattivi sa €20,000, kif ukoll penali kriminali sa €50,000 u priġunerija sa erba’ snin għal ksur gravi.”
Il-Ministru Jonathan Attard
