Mis-16 ta’ Awwissu dawk biċ-ċertifikat tat-tilqim u li kienu f’kuntatt ma’ persuna pożittiva, minflok jagħmlu kwarantina ta’ 14-il ġurnata issa se jkunu obbligati jagħmlu kwarantina ta’ sebat ijiem.
Ħabbar dan id-Deputat Prim Ministru u Ministru għas-Saħħa Chris Fearne waqt konferenza tal-aħbarijiet flimkien mas-Supretendent tas-Saħħa Pubblika, il-Professur Charmaine Gauci.
Chris Fearne qal dan hekk kif ħabbar ukoll li f’pajjiżna fl-aħħar 24 siegħa fiequ ftit aktar minn 200 persuna oħra filwaqt li feġġew 78 każ.
Fil-fatt, dwar dawn il-każijiet ġodda, id-Deputat Prim Ministru ħabbar ukoll li l-maġġoranza tal-każijiet il-ġodda jiġifieri 95% minnhom, huma tal-varjant Delta.
Mara ta’ 88 sena, li kienet pożittiva għall-Covid-19 u li ma kinetx qed tieħu l-kura fl-isptar Mater Dei, tilfet ħajjitha wara li għaxart ijiem ilu kienet irriżultat pożittiva għall-Covid-19.
Qal li 35 persuna qed jieħdu l kura fl-Isptar Mater DeI b’erbgħa minnhom jinsabu fit-Taqsima għall-Kura Intensiva.
Hawnhekk id-Deputat Prim Ministru spjega kif tliet persuni li jinsabu fl-ITU fil-fatt mhumiex imlaqqmin, fosthom mara tqila.
Id-Deputat Prim Ministru qal dan hekk kif spjega wkoll li l-varjant Delta issa huwa l-varjant predominanti madwar id-dinja kollha u l-effett tiegħu jista’ jiġi mkejjel b’kemm kull pajjiż laqqam lill-popolazzjoni tiegħu.
Kien hawn li d-Deputat Prim Ministru qal li l-programm ta’ tilqim f’Malta qed ikun effettiv u għalhekk mhemmx ħtieġa ta’ żieda fir-restrizzjoni.
Ħabbar kif 86% tal-adulti f’pajjiżna huma mlaqqmin kompletament u 88% ħadu mill-inqas l-ewwel doża.
Dan filwaqt li 68% tat-tfal ta’ bejn it-12 u l-15-il sena ħadu l-ewwel doża u 39% kompletament imlaqqma.
Intant, fuq il-midja soċjali l-Prim Ministru Robert Abela qal li minħabba li hawn 86% tal-popolazzjoni adulta f’pajjiżna li hija totalment imlaqqma kontra l-Covid-19, issa setgħu jittieħdu passi oħra.
Dr Abela sostna li l-fatti u r-realtà fl-isptarijiet jibqgħu jikkonfermaw li t-tilqim qed jipproteġi ħafna, partikolarment minn sitwazzjonijiet serji.
Huwa appella lin-nies biex iħeġġu lil kull min jafu biex jieħdu t-tilqima għal kontra l-Covid-19.
