Il-Membru tal-Parlament Ewropew Daniel Attard inħatar uffiċjalment bħala membru fil-Kumitat għas-Sigurtà u d-Difiża (SEDE) f’isem il-Grupp tas-Soċjalisti u d-Demokratiċi. Dan il-kumitat, li issa sar kumitat permanenti tal-Parlament Ewropew, se jkollu rwol ewlieni fl-indirizzar tal-isfidi urġenti li qed tiffaċċja l-Unjoni Ewropea fil-kuntest tas-sigurtà globali.
B’din il-ħatra ġdida, Daniel Attard ġie fdat b’responsabbiltà oħra importanti fl-interess nazzjonali u Ewropew. Lil hinn mill-Kumitat tas-Sigurtà u d-Difiża, Attard huwa responsabbli minn setturi kruċjali oħra bħalma huma t-trasport, it-turiżmu, l-enerġija, u l-industrija – oqsma li huma intrinsikament marbuta mas-sigurtà u l-istabbiltà fuq livell Ewropew, b’mod partikolari l-provvista tal-enerġija, il-ħarsien tal-infrastruttura u l-moviment ħieles.
B’reazzjoni għall-ħatra tiegħu, l-Ewroparlamentari Laburista qal li l-involviment ta’ Membru Parlamentari Malti fuq dan il-kumitat huwa essenzjali biex, filwaqt li l-Unjoni tilħaq il-miri strateġiċi tagħha, dan ma jsirx a skapitu tal-interess nazzjonali u l-pożizzjoni kostituzzjonali ta’ pajjiżna.
F’dan il-kuntest, Dr Daniel Attard tenna l-impenn tiegħu li, permezz tar-responsabbiltà ġdida li ingħatatlu f’kumitat daqstant importanti, huwa jkompli jiddefendi l-interessi tal-Maltin u l-Għawdxin kollha fl-Ewropa.
