Il-Malta FA riċentement iltaqgħet mal-Kap Eżekuttiv il-ġdid tal-Awtorità għall-Integrità fl-Isport Malti (AiMS), Jean Claude Micallef, biex tiddiskuti sensiela ta’ suġġetti importanti li jvarjaw minn affarijiet regolatorji u legali, il-promozzjoni tal-integrità fl-isport u l-ġlieda kontra l-manipulazzjoni.
Waqt il-laqgħa, li saret fil-bini tal-MFA, il-President tal-MFA, Bjorn Vassallo, ta ħarsa ġenerali lejn il-ħidma li saret mill-Assoċjazzjoni f’dawn l-aħħar snin b’rabta mal-preservazzjoni tal-integrità fil-football u l-introduzzjoni ta’ diversi inizjattivi ta’ governanza tajba biex jgħinu biex titneħħa kondotta mhux xierqa.
Preżenti għal din il-laqgħa attendew ukoll is-Segretarju Ġenerali, l-Avukata Maria Azzopardi, id-Deputat Segretarju Ġenerali, Rodney Pisani u l-Uffiċjal tal-Integrità, l-Avukat Herman Mula, li enfasizzaw numru ta’ suġġetti għad-diskussjoni, fosthom ir-ristrutturar korporattiv tal-klabbs li jarawhom joperaw fi ħdan mudell ta’ negozju ġdid.
Id-delegazzjoni tal-AiMS esprimiet ir-rieda tagħha li tikkopera mal-MFA dwar kwistjonijiet bħal dawn u li tkompli b’taħditiet dwar l-importanza tal-qsim tal-għarfien għal proċessi aktar sikuri u effiċjenti.
Il-laqgħa ffokat ukoll fuq ir-rieda taż-żewġ partijiet biex l-MFA ssir waħda mill-ewwel entitajiet sportivi lokali li tkun reġistrata uffiċjalment mal-AiMS.
F’kumment waqt il-laqgħa, il-President Vassallo qal li l-MFA kienet katalist biex timbotta l-ħolqien ta’ awtorità li tissalvagwardja l-valuri u l-etika fl-isport.
“Barra minn hekk aħna lesti li nipprovdu r-riżorsi u l-għarfien tagħna biex inkunu nistgħu ngħinu lill-AiMS fejn possibbli, billi diġà jkollna l-istrutturi u l-għodod fis-seħħ biex jipprevjenu l-manipulazzjoni u nħarsu l-integrità,” temm jgħid il-President Vassallo.
Meta għamel referenza għall-proċess ta’ reġistrazzjoni ta’ organizzazzjonijiet sportivi f’Malta, il-Kap Eżekuttiv ta’ AiMS, is-Sur Micallef qal: “Huwa importanti ħafna li jiġu evitati xenarji ta’ ‘sport orfni’, fejn l-ebda korp governattiv nazzjonali ma jwassal għal esklużjoni jew limitazzjonijiet bla bżonn.”
Huwa żied jgħid li l-MFA kienet katalist fuq diversi miżuri ta’ integrità u qed tistenna bil-ħerqa li tara lill-Assoċjazzjoni ssir l-ewwel entità sportiva f’Malta li tkun reġistrata uffiċjalment mal-AiMS.
