Illum id-delegazzjoni Maltija tal-Partit Laburista fil-Parlament Ewropew ivvutat favur il-proposta tal-Kummissjoni ‘stop the clock’ fir-rigward tad-dati minn meta l-Istati Membri għandhom japplikaw ċerti rekwiżiti relatati mar-rappurtaġġ korporattiv ta’ sostenibilità u d-due diligence. Dan se jiżgura l-istabbiltà u jagħti ċertezza u serħan il-moħħ liċ-ċittadini u n-negozji.
Barra minn hekk, huwa wkoll inkoraġġanti li l-maġġoranza pro-Ewropea fil-Parlament se tkun qed taħdem b’mod konġunt fuq il-pakkett Omnibus. L-impenn li nwasslu riżultati għall-ġid komuni taċ-ċittadini, in-negozji u l-pjaneta tagħna huwa kruċjali.
Issa se nkunu qed naħdmu bħala Delegazzjoni Laburista Maltija lejn approċċ bilanċjat tal-PE immirat lejn simplifikazzjoni li tipproteġi liċ-ċittadini tagħna u lill-SMEs tagħna, u waħda li tqis l-ispeċifiċitajiet tal-pajjiżi, filwaqt li fl-istess ħin iżżomm l-istandards tal-UE ta’ livell għoli li aħna lkoll imdorrijin bihom.
