Sinonimi ma’ dawn iż-żminijiet ta’ festi, meta nfakkru t-twelid ta’ Ġesù Bambin, hemm diversi għanjiet tradizzjonali tal-Milied li jkomplu jdaħħlu fl-ispirtu
Żgur li bosta jagħrfu n-noti mużikali, imma forsi mhux daqstant jafu minn fejn oriġinaw dawn l-għanjiet, li l-istorja tagħhom tmur lura snin twal.
Dan l-istazzjon tkellem ma’ Brian Bonnici li huwa magħruf li jippromwovi l-kultura Maltija.
Qal li l-ewwel indikazzjonijiet ta’ għanja tal-Milied jeħduna fil-kapitali Taljana.
Bonnici tenna, “Hemm indikazzjonijiet fis-sena mija u għoxrin, ġewwa Ruma hemm għanja li nstabet u li kien jisimha l-Għanja tal-Anġli, imbagħad ovvajment grazzi għal Sant’Elena u l-Imperatur Konstantinu li ta l-libertà tat-twemmin allura bdew isiru ċelebrazzjonijiet u magħhom żviluppaw l-għanjiet tal-Milied.”
Il-Maltin dawru dawn l-innijiet għal stil tradizzjonali u bosta mużiċisti wżaw strumenti ta’ dari biex iferrħu lin-nies.
Huwa qal, “Missirijietna żviluppaw dawn l-għanjiet ovvjament bl-istil tradizzjonali tagħna, bl-istrumenti primittivi, iż-żaqq, ir-rabbaba, it-tambur illi dawn ukoll sabu posthom fil-presepju permezz tal-pasturi. Dawn id-daqqaqa li kienu jduru fit-toroq. Speċjalment f’Għawdex hemm ċertu daqqaqa li tant rabtu kult magħhom li għadhom jisemmew sal-ġurnata tal-lum għalkemm għaddew is-snin.”
Bla ebda dubju, li fost l-aktar għanjiet popolari tal-Milied bil-pinna Maltija, hija Ninni La Tikbix Iżjed, li warajha hemm storja interessanti ta’ Ġiżwita.
Stqarr, “Bla dubju ta’ xejn l-aktar waħda li tispikka hija n-Ninni La Tikbix Iżjed ta’ Patri Indri Schembri. Dan ngħidu li kiteb din l-għanja għall-Maltin, huwa kien Ġiżwita u emigrant ukoll għall-Maltin tal-Alġerija. Tajjeb ngħidu li dan ma qabadx u kiteb għanja tal-Milied biss. Hawn min jaħseb li dan kitibha għall-Maltin biex jiċċelebraw il-Milied imma dan qabad ħafna għanjiet u kitibhom għal diversi ċerimonji reliġjużi matul is-sena kollha u waħda minnhom kienet din u saret popolarissima.”
Tul is-snin, anki aktar riċenti, diversi għanjiet bdew jieħdu xejra moderna li tidher li qed tintogħġob min-nies.
