Alfred u Kurċifissa Gauci ilhom miżżewġin tlieta u sittin sena.
Hi minn Ħaż-Żabbar, u hu mill-Ħamrun, u wara snin jgħixu l-Fgura, issa jinsabu fir-Residenza San Vinċenz de Paul, fejn ħadu t-tilqima kontra l-COVID-19.
Lejliet Jum San Valentinu, fil-ġurnata li Freddie ċċelebra għeluq sninu, tkellmu magħna dwar l-esperjenzi li sawru r-relazzjoni tagħhom.
B’ċertu dettall, Kurċifissa teħodna lura għal meta kellha sbatax-il sena, meta tefgħet ħarsitha l-ewwel darba fuq Freddie.
Qalet kif, “Ħadt grazzja miegħu hux, imbagħad staqsejt wieħed kien hemm, u ġie, iltqajna, konna mmorru nieħdu naqra te, iħallasli te bla ħalib u daqshekk hux u bqajna minn dakinhar ’l hawn.”
L-anzjana qaltilna li l-għerusija fi żmienha kienet differenti minn dik tal-lum.
Spjegaw kif, “L-għerusija ta’ dak iż-żmien mhux bħal-lum Paceville. Nhar ta’ Ħadd kien jiġi mill-Ħamrun, noqogħdu fil-gallarija, kelli trays tal-injam bil-crafts, kien joqgħod jarali l-kuluri taż-żibeġ u nagħmlu d-doilers.”
Bi tbissima, Kurċifissa qaltilna li wara ftit snin flimkien, riedet tiżżewweġ, u l-istess Alfred, għax ma riedx jitlifha.
Qal, “Sibt kollox fiha, issajjar tajjeb għax kieku m’għadnix ħaj hux! Ħwejjeġ tgħinni, m’għandix xi ngerger.”
B’ton ta’ umoriżmu, l-anzjana tkellmet dwar episodju li għadu jnisslilha tbissima sal-lum, meta kienu jmorru l-kors Ta’ Kana.
Qalu kif, “Dun Ġwann kien jgħidilna, fejn tmur l-għarusa, trid tmur warajha. U dan dejjem kien iħobb jiġbed naqra s-saqajn, u qallu jekk immur per eżempju fil-kamra tal-banju rrid immur warajha?”
Il-koppja qaltilna li flimkien daru l-Ewropa u għandhom erba’ passaporti mimlijin timbri. Imma l-ħajja mhux sabiħ biss, u ma’ din il-koppja kienet bħal pinta ħelu u bitija morr.
Ftit wara li żżewġu, tilfu tlett itfal.
Spjega, “Jiena ħassejt ħafna għax din ma riditx toħroġ mid-dar, kelli mmur iċ-ċimiterju nidfen kollox jien waħdi, trid tarani għaddej bit-tebut abjad f’idejja u nagħtihulhom biex jidfnuhom.”
F’dawn is-snin kollha qatt ma qattgħu lejl ’il bogħod minn xulxin, imma din is-sena l-istorja kienet differenti.
Mal-bidu tas-sena l-ġdida, Freddie kellu bżonn jagħmel intervent l-isptar, u qatta’ erba’ ġimgħat ’il bogħod minn martu.
Qal kif, “Ħassejtha hux għax anki per eżempju filgħodu tgħidli xi qmis nilbes u tgħinni naqfel l-affarijiet, ngħinu lil xulxin, bżonn xulxin it-tnejn u ilna daż-żmien kollu flimkien, impossibbli tifridna issa.”
Għal Freddie u Kurċifissa, Jum San Valentinu jiġi kuljum, għaliex b’ħarsa f’għajnejn xulxin li tixhed il-fjamma li għadha titkebbes sal-lum, it-tnejn jidhru kemm iħobbu lil xulxin, anki jekk b’ċajta, Kurċifissa qaltilna li f’żewġha għandha daqs għaxart itfal.
Spjegaw kif, “Trid tieħu paċenzja, ċertu affarijiet ma tiħux għalik, tipprova tikkuntenta lil min ikollok miegħek u timxi. Immorru hawn, immorru hawn, immorru hemm, immorru hemm, nixtru flimkien, hekk l-aħjar. Trid tgħid sorry, ma nerġax u nippruvaw niftehmu.”
