Il-President ta’ Malta George Vella ddeskriva l-imħabba lejn il-proxxmu li juru n-nies permezz tad-donazzjonijiet tagħhom lill-Community Chest Fund bħala mhux biss att ta’ karità ma’ ħaddieħor iżda wkoll investiment f’dak li jista’ jkollna bżonn aħna stess jew nies qrib tagħna ħafna.
Dan qalu waqt attività li saret sabiex donazzjonijiet nġabru minn għadd ta’ għaqdiet volontarji u soċjetajiet Naxxarin għall-Community Chest Fund. L-attività, li ilha ssir għal dawn l-aħħar 26 sena fil-jum tal-Ħadd qabel il-festa ta’ Marija Bambina, ġiet organizzata barra l-kwartieri tal-Iscouts tan-Naxxar bil-miżuri kollha ta’ prevenzjoni stipulati mill-awtoritajiet tas-saħħa.
Filwaqt li rringrazzja lin-Naxxarin għall-ġenerożità tagħhom u xtaqilhom il-festa t-tajba, minkejja ċ-ċirkustanzi straordinarji, il-President George Vella spjega kif id-diffikutajiet li qed tħabbat wiċċha magħhom il-Community Chest Fund illum huma ħafna akbar milli kienu fis-snin li għaddew. In-numru tal-pazjenti li jeħtieġu l-għajnuna żdied filwaqt li l-ispejjeż tal-mediċini tal-kanċer splodew ’il fuq. Huwa semma kif tliet pilloli li jiswew €69,000. Hemm ukoll il-fattur pożittiv li ħafna minn dawk li bdew jingħataw il-mediċina tliet snin ilu baqgħu ħajjin b’riżultat ta’ dan, imma dik il-mediċina jridu jibqgħu jeħduha. Dan ifisser li, bħala numru ta’ benefiċjarji, dawn jiżdiedu mal-każijiet il-ġodda li jkomplu deħlin sena wara l-oħra.
Fl-2015 l-ispiża tal-Fond fuq il-mediċini kienet taħt il-€1 miljun, fl-2018 telgħet għal €8 miljun, fl-2019 laħqet l-€10 miljun, u huwa stmat li din is-sena se titla’ għal €12- jew €13-il miljun.
Il-President saħaq li l-Community Chest Fund teħtieġ aktar minn miljun ewro fix-xahar.
Dr. Vella rrimarka li spiċċa żmien li l-Community Chest Fund jibqgħalha anki xi ħaġa żejda tal-flus li setgħu jiġu investiti fi proġetti. F’dan il-kuntest, irrefera għal kitbiet li dehru fil-midja soċjali, li qalu li l-Fond kien qed jagħtu l-flus mhux biss għall-mard iżda għall-organizzazzjonijiet mhux governattivi. Spjega kif fil-passat, meta kien hemm xi flus żejda, ċerti organizzazzjonijiet mhux governattivi ntalbu joffru programmi ta’ għajnuna soċjali u oħrajn ta’ ħidma mal-persuni b’diżabilità ħalli tingħatalhom għajnuna permezz ta’ dawn il-flus.
Il-President fakkar f’kif, minħabba l-pandemija, din hija sena partikolari li fiha lanqas l-attivitajiet annwali li s-soltu jorganizzaw l-organizzazzjonijiet filantropiċi ma jistgħux isiru – fil-każ tal-Community Chest Fund dawn jinkludu r-Rockestra u l-Fun Run. Barra minn hekk, ċerti imprendituri li kienu jkunu fuq quddiem biex jgħinu bid-donazzjonijiet tagħhom, illum għaddejjin minn żmien iebes u jifilħu joffru inqas, jekk mhux saħansitra xejn.
Ritratti: OPR
