Jannar li għadda kien l-aqwa xahar fl-istorja ta’ Malta għat-turiżmu.
Dan hekk kif aktar minn mija sitta u tletin elf turist żaru pajjiżna; żieda ta’ seba’ fil-mija fuq l-istess perjodu tal-2019. L-istess sena li Malta rreġistrat rekord ta’ turisti fl-istorja.
Fl-aħħar tliet snin, il-Gvern investa €35 miljun fil-Kottonera. L-akbar investiment fl-istorja ta’ pajjiżna fil-qalba tal-Isla, Birgu, Bormla u Kalkara.
Dan intqal mill-Ministru Clayton Bartolo u d-Deputat Parlamentari Glenn Bedingfield, waqt konferenza tal-aħbarijiet li fiha saħqu fuq kif l-investiment u fiduċja huma l-aktar żewġ fatturi li jikkaratterizzaw it-tmexxija ta’ Robert Abela.
Il-Ministru Clayton Bartolo sostna li pajjiżna jista’ jagħmel qabża ta’ kwalità permezz tal-konnettività bl-ajru, ir-reklamar kontinwu, u r-riġerenazzjoni taż-żoni turistiċi.
Huwa sostna li pajjiżna huwa fost l-aktar pajjiżi fid-dinja li rkupra malajr fit-turiżmu.
“Jekk naraw għal din is-sena, għandna l-linja tal-ajru Ryanair li ħabbret l-akbar kalendarju li qatt kellha minn u lejn pajjiżna matul is-snin, jiġifieri dik ta’ 66 rotta. Overall, għal dan is-sajf għandna xejn inqas minn 100 rotta minn 32 destinazzjoni differenti.”
Id-Deputat Glenn Bedingfield qal li f’dawn l-aħħar tliet snin sar investiment rekord fil-qalba tal-Kottonera, b’total ta’ €35 miljun li jinkludu proġetti ta’ restawr, pixxina tal-ogħla livell, xogħlijiet ta’ tisbiħ u ta’ riġenerazzjoni.
“Kważi €8 miljun fuq ir-restawr. Hemm seba’ kilometri ta’ fortifikazzjonijiet li qegħdin ikunu restawrati. Ħloqna spazju ġdid fuq is-Sur ta’ San Mikiel fl-Isla u d-daħla, proġett li se jkun qiegħed jinvesti fih, il-Gvern, mal-€4 miljun. Qegħdin nagħmlu promenade ġdida fil-Birgu u l-Kalkara, jiġifieri l-area magħrufa bħala Tat-Toqba, Triq Sally Port, il-Birgu, qed isiru b’mod ġdid. Hemmhekk se ssir promenade waħda illi llum tista’ mill-Kalkara, minn ħdejn l-Esplora, tibqa’ sejjer sal-Isla.”
Il-kelliema rrimarkaw li l-investiment iġib aktar investiment u l-fiduċja ġġib iżjed fiduċja. Dan hu dak li qed jagħmel il-gvern Laburista bħalissa u dak li se jibqa’ jagħmel.
Dan kollu jkompli jixhed il-fiduċja f’pajjiżna; fiduċja fin-negozji, fiduċja fil-familji u, fuq kollox, fiduċja fil-poplu.
