Is-sena l-oħra, l-investiment fuq il-pensjonijiet u l-benefiċċji soċjali kien l-akbar wieħed fl-istorja ta’ pajjiżna, kif ikkonfermat minn ċifri tal-Uffiċċju Nazzjonali tal-Istatistika, l-NSO.
Fi stqarrija, il-Ministeru għall-Politika Soċjali wkoll qal li dan l-investiment soċjali wkoll irdoppja meta mqabbel ma’ 12-il sena qabel. Dan hekk, kif is-sena l-oħra, l-investiment kien ta’ kważi seba’ mitt miljun aktar mill-2012.
Is-sena l-oħra, il-benefiċċjarji kollha, kemm dawk kontributorji kif ukoll dawk mhux kontributorji, tħallsu kważi €1.5 biljun.
Meta mqabbel ma’ sena qabel, l-investiment kiber bi kważi €166 miljun. B’din kienet l-akbar żieda li qatt ġiet irreġistrata f’sena waħda fl-investiment soċjali.
Analiżi taċ-ċifri turi li l-aktar li bbenefikaw kienu pensjonanti u anzjani, u familji bi tfal, hekk kif bejniethom ħadu aktar minn 80% tal-ħlasijiet tal-benefiċċji kontributorji u mhux kontributorji.
L-investiment fuq il-pensjonijiet tal-irtirar, tal-invalidità, tar-romol u tal-età mhux kontributorja, flimkien mal-bonus li jitħallas separatament lil dawn il-benefiċċjarji, b’kollox żdied b’aktar minn €101 miljun u laħaq il-€1.16 biljun.
Iċ-ċifri tal-NSO juru wkoll li, is-sena l-oħra, il-familji bit-tfal gawdew mill-akbar żidiet qatt mogħtija f’sena waħda, kemm fil-benefiċċji li jitħallsu għat-tfal u kif ukoll fil-ħlas tal-benefiċċju addizzjonali għall-għoli tal-ħajja.
Bejniethom dawn żdiedu bi kważi €45 miljun f’sena waħda biss. B’dawn jinkludu ċ-Children’s Allowance u anke l-allowance speċjali ta’ €500 fis-sena għal madwar 10,300 student li jkomplu bl-istudji tagħhom wara l-età obbligatorja.
Kważi mija u sebat elef persuna gawdew mill-benefiċċju addizzjonali tal-COLA, fejn b’kollox gawdew aktar minn tnejn u erbgħin miljun ewro.
Il-Ministru responsabbli Michael Falzon stqarr li l-istatistika mhux biss turi kemm kibret il-firxa tal-investimenti soċjali, iżda wkoll il-progress li sar bis-saħħa tat-tisħiħ tal-ekonomija tal-pajjiż.
Dan hu rifless f’rati rekord ta’ impjiegi, l-inqas livelli ta’ qgħad u tnaqqis fil-faqar u d-dipendenza soċjali, tant li, fuq medda ta’ għaxar snin, l-għadd ta’ dawk fuq l-assistenza soċjali niżlu bi 62%, filwaqt li persuni fuq l-assistenza għall-qgħad niżlu bi 92%.
