Il-qabda rekord fil-Port Ħieles, li għamlet id-Dwana Maltija ta’ 800 kilogramma ta’ droga kokaina, b’valur ta’ aktar minn mitt miljun ewro, kienet frott il-persevaranza u anke l-kuntatti ta’ tqassim ta’ intelliġenza li d-Dwana Maltija rnexxielha tibni fl-aħħar snin.
Sostna dan id-Direttur Ġenerali tad-Dwana Joe Chetcuti ma’ ONE News l-għada li ħarġet l-aħbar bl-interċettazzjoni tad-droga f’kaxxi tal-banana fil-Port Ħieles.
Chetcuti stqarr, “Waqt li ma nista’ qatt nissotovalita sehem it-tagħmir bl-investiment li għamlet id-Dwana għax permezz tiegħu nkunu preċiżi ħafna u naraw l-affarijiet mingħajr ma niftħu. Però din id-darba s-sodisfazzjon hu akbar għaliex kien hemm element ieħor importanti ħafna li kkontribwixxa. F’dawn l-aħħar snin fil-fatt bnejna relazzjoni professjonali tajba ħafna ibbażata fuq il-fiduċja ma’ aġenziji barranin li jwassal biex ikun hemm skambji effettivi ta’ intelliġenza.”
Fost dawn ir-relazzjonijiet; hemm relazzjoni mal-EUROPOL, l-Unjin tad-Dwana Ewropea u l-Organizazzjoni Dinjija tad-Dwana.
Hu sostna,“U dan kien każ fejn l-intelliġenza li kienet qed taslilna u li kienet qed tinġabar qabel il-wasla tal-kontejner hawn Malta kienet tant preċiża li konna nafu li meta niftħu ħa nsibu dak li verament sibna tant kemm l-intelliġenza kienet tajba. Jiġifieri dan l-iskambju ma’ aġenziji Nazzjonali u Internazzjonali jiswew mitqlu deheb. Tajjeb li jkollok apparat imma kemm hu aħjar li jkollok din it-tip ta’ intelliġenza.”
Id-droga tal-Ħamis kienet moħbija f’kontejner li kien ġej mill-port ta’ Turbo fil-Kolumbja u kien fi triqtu lejn it-Turkija.
Hija kienet moħbija fuq il-parti ta’ barra tal-kontejner, li turi li aktarx d-droga kokaina ma kinitx destinata biex tasal it-Turkija imma jaf kienet se tinġabar qabel.
Chetcuti rrimarka, “Tagħti x’wieħed jissuspetta li l-modus operandi kien se jkun wieħed ta’ rip off, jiġifieri lid-droga tpoġġiet hemm bil-għan li tonqos mill-kontejner qabel il-wasla fid-destinazzjoni tagħha, għax kienet eżatt wara l-bieba. Jiġifieri l-bieba tinfetaħ tittieħed id-droga u terġa’ tingħalaq il-bieba. Jiġifieri meta tkun hekk mal-bibien mas-suspetti jkunu li hemm elementi ta’ rip off.”
