L-immigrant mill-Ghana, li kien wasal f’pajjiżna tlettax-il sena ilu mingħajr dokumenti, qabel li jirritorna minn jeddu fil-pajjiż tal-oriġini tiegħu u japplika formalment biex ikun jista’ jkompli jgħix fostna.
Il-kwistjoni ta’ Kusi Dismark, li nstab li kien qed jgħix bla permess għal dan iż-żmien kollu fejn laħaq stabbilixxa ruħu, għamel kors fl-istituzzjonijiet edukattivi lokali u anke fetaħ ħanut fil-Ħamrun, ħadet żvolta oħra fl-aħħar ħinijiet fejn ukoll ħarġet l-importanza li persuni f’qagħda simili jibqgħu jiġu regolarizzati.
Hu kien ilu miżmum minn uffiċjali tal-immigrazzjoni mill-21 ta’ Jannar li għadda u kien qed jiffaċċja deportazzjoni forzata, xi ħaġa li qanqlet sejħiet għal politika tal-immigrazzjoni aktar umana.
Issa wara taħditiet delikati li kien hemm fit-tul bejn l-awtoritajiet Maltin, immexxijin mill-Ministeru għall-Intern, u l-avukati tar-raġel, jidher li wkoll ġie maqbul li dan issa ma jiġix imċaħħad mid-dritt li jidħol lura fil-pajjiż ladarba jkun irregolarizza l-pożizzjoni tiegħu.
L-avukati tiegħu, Dr Adrian Sciberras u Dr Gianluca Cappitta, qalu mal-MaltaToday li Dismark “ħalla l-pajjiż il-Ġimgħa filgħodu b’mod volontarju” u, wara intervent mill-Gvern u dak deskritt bħala “djalogu kostruttiv” mal-Uffiċjal Prinċipali tal-Immigrazzjoni sal-Ħamis filgħaxija, ir-raġel mhux se jkun qed jiffaċċja sospensjoni milli jidħol lura fil-pajjiż.
