Fi tmiem analiżi estensiva tal-ekonomija tagħna minn grupp ta’ esperti tal-Fond Monetarju Internazzjonali (IMF), il-Bord Eżekuttiv ta’ din l-istituzzjoni ewlenija kellu kliem ta’ tifħir għall-mod kif qed titmexxa l-ekonomija ta’ pajjiżna.
Fil-fatt, huma kkonkludew li l-irkupru ekonomiku ta’ pajjiżna mill-pandemija kien b’saħħtu ħafna, tant li pajjiżna kellu t-tieni l-aqwa rata ta’ tkabbir minn fost il-pajjiżi kollha taż-żona ewro.
L-IMF tbassar li din is-sena l-ekonomija Maltija se tkun kibret b’6.5%, rata ferm għola minn dawk imbassra minn istituzzjonijiet oħra, u reviżjoni ‘l fuq kumparat mat-tbassir preċedenti tagħhom. Dan filwaqt li nnutaw li l-inflazzjoni baqgħet fost l-inqas fiż-żona Ewro u kif dan ġie rifless grazzi għall-politika tal-Gvern sabiex jagħmel tajjeb għaż-żidiet fil-prezzijiet tal-enerġija u l-fjuwils għall-konsumaturi.
Barra minn hekk tgħid li r-rata ta’ qgħad baqgħet storikament baxxa.
Minkejja li s-sitwazzjoni ekonomika Internazzjonali mistennija tmur għall-agħar, l-esperti tal-IMF qed ibassru li l-ekonomija ta’ pajjiżna se tibqa tikber, filwaqt li l-inflazzjoni mistennija tonqos.
Mentri l-Opposizzjoni tikkritika b’mod kontinwu l-politika fiskali tal-Gvern u ssostni li mhux sostennibli, skont l-IMF, il-Budget għas-sena d-dieħla huwa “appropriate” u jagħmel sens fid-dawl taċ-ċirkostanzi preżenti.
Dan filwaqt li jilqgħu l-impenn tal-awtoritajiet biex ikun hemm konsolidament fiskali fuq terminu medju ta’ żmien.
Dan kif ukoll il-mod ta’ kif il-Gvern qiegħed iħares bir-reqqa lejn il-prijoritajiet fl-ispiża pubblika.
L-esperti internazzjonali tal-IMF laqgħu wkoll il-ħidma li wettaq il-Gvern fil-qasam istituzzjonali filwaqt li rrimarkaw l-impenn politiku li wassal biex Malta ħarġet mill-lista l-griża tal-FATF fi żmien rekord.
Ir-rapport jinnota ż-żieda qawwija fir-riżorsi allokati lill-istituzzjonijiet regolatorji kif ukoll il-progress li sar fl-implimentazzjoni tar-regolamenti. Dan filwaqt li nnutaw kif fl-aħħar sentejn l-awtoritajiet wasslu għal progress fir-riforma tas-sistema ġudizzjarja tal-pajjiż.
Ir-rapport jilqa’ wkoll il-ħidma tal-Gvern biex pajjiżna iwettaq it-trasformazzjoni ambjentali u diġitali fis-snin li ġejjin, speċjalment il-pjan ta’ rkupru u resiljenza.
Dan filwaqt li jħeġġu l-politika tal-Gvern biex jitjiebu l-ħiliet tal-ħaddiema u biex tkompli tiżdied il-parteċipazzjoni fis-suq tax-xogħol. Barra minn hekk l-esperti nnutwaw kif fil-Budget 2023 il-Gvern daħħal miżuri biex inaqqas mill-effett tal-inflazzjoni fuq dawk bi dħul baxx.
B’reazzjoni għal dan ir-rapport, il-Prim Ministru Robert Abela fuq il-profil tiegħu fuq Twitter innota l-analiżi tal-esperti indipendenti tal-IMF u kif fost oħrajn innutaw l-irkupru b’saħħtu tal-ekonomija Maltija u li r-rata tal-inflazzjoni baqgħet fost l-inqas fiż-żona ewro.
Dr Abela nnota wkoll l-aċċenn tal-esperti għar-rata ta’ qgħad storikament baxxa f’pajjiżna u t-tifħir lejn ir-riformi istituzzjonali li qed isiru f’pajjiżna.
Filwaqt li l-Prim Ministru Robert Abela tenna li l-esperti tal-IMF inkoraġġixxew lill-Gvern iwettaq iktar riformi, huwa aċċerta l-impenn tal-Gvern favur dan.
