- INSTALLAZZJONI LI SE TIMMARKA S-60 SENA TA’ ELETTRIKU F’MALTA
- SIMBOLU TAL-BIDLA KBIRA LI GĦAMEL PAJJIŻNA FIL-QASAM TAL-ENERĠIJA
Lest biex ikun inawgurat il-mafkar MMXVII, l-akbar installazzjoni artistika permanenti f’Malta, b’tifkira ta’ aktar minn 60 sena ta’ ġenerazzjoni tal-elettriku fil-Marsa.
L-installazzjoni għolja tliet sulari ser tagħti tislima lill-ħaddiema li bnew, ħaddmu, rranġaw u żammew fi stat tajjeb it-turbini u l-boilers ta’ dan l-istazzjon sa mill-1953. Fl-istess waqt, il-mafkar huwa wkoll simbolu tal-iżvilupp tal-qasam tal-enerġija f’Malta, hekk kif fi ftit ġimgħat l-Enemalta ser tkun qed ittemm darba għal dejjem l-użu tal-heavy fuel oil (HFO) fil-ġenerazzjoni tal-elettriku biex minflok tadotta taħlita ġdida ta’ sorsi ta’ enerġija bbażata fuq impjanti b’emissjonijiet baxxi jaħdmu bil-gass naturali, il-Malta-Italy Interconnector u sorsi ta’ enerġija li tiġġedded.
Bħala parti minn dan l-iżvilupp, ftit tal-ġimgħat ilu Enemalta plc. qatgħet għalkollox il-Marsa Power Station mis-sistema tad-distribuzzjoni tal-elettriku tal-pajjiż, biex tiżżarma u twitti t-triq għar-riġenerazzjoni ta’ din il-parti tal-Port il-Kbir fil-Marsa.
Fl-2016, hekk kif beda jirranka x-xogħol ta’ żarmar tal-Marsa Power Station, Enemalta plc. stiednet lill-istudenti tal-Istitut għall-Arti Kreattiva biex iżuru l-istazzjon tal-Marsa u joħolqu installazzjoni artistika bl-użu ta’ diversi biċċiet tal-apparat li jinsab fl-istess stazzjon. Taħt il-gwida tal-għalliema tagħhom u bl-appoġġ tekniku tal-periti, l-inġiniera u t-tekniċi tal-Enemalta, madwar 25 student biddlu l-istazzjon fi spazju ta’ kreattività u arti.
L-istudenti ħejjew għadd ta’ disinji differenti u ppreżentawhom lil bord ta’ ġurija magħmul minn impjegati tal- Enemalta, fosthom ħaddiema tal-istess power station, artist rinomat fil-qasam tal-iskultura bil-metall u s-Sindku tal-Marsa. Tim ta’ studenti, għalliema u impjegati tal-Enemalta komplew jelaboraw id-disinji magħżula waqt li ħejjew l-elementi kollha li jiffurmaw parti minn dan ix-xogħol artistiku. F’dawn l-aħħar ġimgħat, impjegati tal-Enemalta bdew jarmaw l-installazzjoni fuq il-post maġenb iċ-Ċentru tad-Distribuzzjoni tal-Elettriku Marsa North, fi Triq Belt il-Ħażna.
L-Enemalta għadha kif bniet dan iċ-ċentru biex jieħu post il-ħolqa ewlenija tas-sistema tad-distribuzzjoni tal-elettriku li tinsab fil-Marsa Power Station stess.
Studenti oħrajn mill-Istitut tal-Arti Kreattiva wkoll qed jieħdu sehem f’dan il-proġett. Studenti tad-disinn 3D għenu lil dawk tal-arti biex ħejjew il-pjanti u d-dehriet virtwali tal-proposti tagħhom waqt li studenti tal-media ddokumentaw din il-ħidma permezz ta’ ritratti u filmati. Studenti tal-arti performattiva ħejjew koreografija li ser tiġi ppreżentata waqt l-inawgurazzjoni ta’ din l-istruttura, nhar il-Ħamis, 20 ta’ April.
L-Inġinier Fredrick Azzopardi, iċ-Ċermen Eżekuttiv ta’ Enemalta plc., spjega li dan il-proġett artistiku jfakkar mument storiku fl-istorja tal-Enemalta u tas-settur tal-enerġija f’Malta.
“Bħala kumpanija, ftit tas-snin ilu ntrabatna li malli jkollha biżżejjed kapaċità alternattiva permezz tal-impjanti ġodda jaħdmu bil-gass naturali f’Delimara, il-Marsa Power Station ma tibqax cold standby għall-użu f’xi emerġenza iżda tiżżarma darba għal dejjem. Din il-mira qed tintlaħaq fl-2017, fl-40 anniversarju mit-twaqqif tal-Enemalta. Dan il-mafkar huwa simbolu ta’ dan l-iżvilupp importanti, żvilupp li qed iwassal għal ambjent aħjar b’arja aktar nadifa, għal aktar sigurtà, flessibilità u effiċċjenza fil-provvista tal-elettriku għall-klijenti tagħna, għal tariffi raġjonevoli u stabbli u għat-twaqqif ta’ settur tal-enerġija sostenibbli li jwieżen u jenerġizza l-iżvilupp ekonomiku f’pajjiżna, minflok jimmażrah.”
