Quddiem folla t’eluf ta’ ċittadini fi Pjazza Kastilja, il-Prim Ministru Joseph Muscat ħabbar elezzjoni ġenerali nhar is-Sibt, tlieta ta’ Ġunju 2017.
Tħabbira li saret f’Jum il-Ħaddiem.
Ħaddiema, u ċittadini li taħt Gvern Laburista gawdew bil-bosta, fi triq li għadha biss f’nofs triq. Gvern li wettaq aktar minn ħamsa u tmenin fil-mija tal-manifest elettorali tiegħu, bl-ikbar tkabbir ekonomiku fl-istorja, iktar xogħol, inqas qgħad, surplus minflok defiċit, tnaqqis fil-faqar, iktar drittijiet ċivili u ferm u ferm iżjed.
Fil-fatt il-Prim Ministru tenna li issa wasal il-ħin tal-għażla, fejn fi żmien fejn l-affarijiet f’pajjiżna mexjin wisq tajjeb, irid jiżgura l-kontinwazzjoni ta’ dan fil-ġejjieni, fi żmien fejn l-instabbiltà li qed tinħoloq mill-Oppożizzjoni qed tkun ta’ ħsara għal pajjiżna u ċ-ċittadini.
“L-aġir ta’ min għalih jista’ jissagrifika s-suċċess tal-pajjiż għax iddispjrat politikament u jrid jidher li qed jagħmel xi ħaġa, beda jaffettwa r-ritmu ekonomiku ta’ pajjiżna. Kull min qed fin-negozju f’din l-aħħar ġimgħa daq ftit mill-effett ta’ ħaddieħor fuq l-ekonomija. Jien mhux se nħalli li l-ekonomija ta’ pajjiżna tispiċċa vittma tad-delużjoni politika tiegħu u tal-ftit madwaru. Jien se niddefendi l-post tax-xogħol tagħkom u rrid nara li nkomplu nikbru u nġibu aktar ġid lejn Malta u Għawdex.”
Fakkar fl-attakk fuqu u fuq familtu fl-aħħar jiem, però tenna li hu seren u ma jibżax, għax miegħu għandu l-verità, u l-maġġoranza silenzjuża tal-Maltin u l-Għawdxin li ma jridux dan l-aġir estremist.
“Paċi li ġejja mill-fatt li aħna m’aħniex marbutin mas-siġġur. Serenità li ġejja mill-fatt li aħna għandna għatx li nservu u niddeċiedu, mhux għatx għal poter. Paċi li ġejja mill-fatt li l-unika għodda li ħaddieħor fadallu kontrina huwa l-gideb. Dan il-gideb se naffrontawh bis-saħħa tal-verità u l-umiltà.”
Tenna li l-Gvern għandu pjan għall-ħames snin li ġejjin, fejn irid ikompli jibni fuq dak li beda fl-aħħar erba’ snin – ikompli jkabbar l-ekonomija, jqassam il-ġid b’ġustizzja, li jkun hawn xogħol għal kulħadd, li tkompli togħla l-paga, drittijiet ugwali, inqas faqar, u futur aħjar għaċ-ċittadini kollha.
Dan f’kuntrast mal-gideb u l-instabbiltà li ġejjin minn dik li sejjaħ il-Koalizzjoni tal-Konfużjoni.
“Jien m’iniex lest nissagrifika dak kollu li ksibna flimkien f’idejn min jasal għal kollox għal poter, anki kif għamlu li jissugraw l-ekonomija u l-post tax-xogħol tagħkom, għall-iskopijiet politiċi partiġġjani.”
Għaldaqstant il-Prim Ministru tenna li għalkemm l-elezzjoni se tiġi tmien xhur kmieni, tfisser li jekk il-poplu jagħti l-fiduċja mill-ġdid lil Gvern Laburista, se nkunu ggwadanjajna ħames snin, biex dan il-proċess li nbeda ma jiqafx nofs triq, u biex titwettaq il-viżjoni…il-ħolma ta’ dan il-moviment għal pajjiżna.
“L-għażla hija ċara. L-għażla hija lil min tridu Prim Ministru biex tafdaw li jġib xogħol u jmexxi l-pajjiż. Jekk hux lili jew lil Simon Busuttil.
Dik hi l-għażla li tridu tagħmlu. Jien għandi ħolma għal pajjiżna, u flimkien magħkom irrid nagħmilha realtà.
Għandna l-kredibilità li biha tafu li kif wettaqna, se nerġgħu inwettqu. Biex dak li ħaddieħor jitkellem dwaru, aħna nagħmluh realtà.
Minn hawn u 34 jum ieħor, se niddeċiedu jekk niqfux nofs triq u naqgħu lura, jew nibqgħux mexjin b’ħeffa ’il quddiem. Jien lest li nimxi magħkom. Ejja ma niqfux nofs triq. Ejja nkomplu nimxu din it-triq flimkien.”
