-Kitba tas-Segretarju Parlamentari għaż-Żgħażagħ, ir-Riċerka u l-Innovazzjoni, Keith Azzopardi Tanti
Il-ġlieda kontra l-kanċer tmiss lil kulħadd, kemm individwalment kif ukoll bħala soċjetà. Ħafna minna esperjenzajna lil xi ħadd mill-familja li ntlaqgħet minn din il-marda. U kollha kemm aħna nafu kemm huwa bżonjuż li nibqgħu niġġieldu din il-marda. B’għarfien ta’ dan, il-Fondazzjoni Cancer Research and Innovation Hub Malta (CRIHM) niedet Mobile Unit ġdid bil-għan li tressaq informazzjoni u edukazzjoni dwar l-importanza tal-prevenzjoni tal-kanċer direttament fil-komunitajiet Maltin u Għawdxin.
Bħala Segretarju Parlamentari responsabbli mir-Riċerka u l-Innovazzjoni, huwa ta’ sodisfazzjon li nara din l-¬inizjattiva ssir realtà. L-iskop ta’ din l-għodda mobbli huwa wieħed ċar: li nressqu l-għarfien dwar il-kanċer aktar viċin in-nies, noħolqu kultura ta’ prevenzjoni u nkattru aktar kuxjenza dwar din il-marda qerrieda.
L-Impenn tal-Gvern għall-Prevenzjoni u Riċerka fuq il-Kanċer
Il-kanċer għadu sfida serja fuq livell globali, u dan juri kemm hi kruċjali l-ħidma ta’ prevenzjoni, screening u trattament. Il-Gvern Malti qed ikompli jinvesti f’dan il-qasam b’serjetà, u wara li s-sena li għaddiet kien hemm allokazzjoni ta’ €600,000 f’fondi għal proġetti ta’ riċerka dwar il-kanċer, din is-sena l-ammont żdied għal €1 miljun -f’finanzjament tar-riċerka fuq il-kanċer. L-introduzzjoni ta’ dan il-Mobile Unit huwa eżempju ċar ta’ kif ir-riżorsi qed jitqassmu b’mod strateġiku biex inwasslu informazzjoni u servizzi essenzjali lin-nies.
Il-Mobile Unit mhux biss ser jiffoka fuq il-prevenzjoni u l-importanza ta’ ħajja sana, iżda se tkun ukoll mezz effettiv biex jinħoloq aktar għarfien dwar l-opportunitajiet ta’ screening. Hawnhekk, l-edukazzjoni hija ċ-ċavetta ta’ kollox. L-aktar għodda qawwija fil-ġlieda kontra l-kanċer hija d-detezzjoni bikrija, peress li l-istudji juru b’mod ċar li meta l-kanċer jinsab f’fażi bikrija, il-possibbil¬tajiet ta’ sopravvivenza jiżdiedu b’mod sinifikanti.
Il-Kooperazzjoni mal-Komunità u r-Rwol tal-Isports
Dan il-proġett innovattiv ma kienx ikun possibbli mingħajr sħubijiet b’saħħithom mal-komunità. Organizzazzjonijiet lokali, bħall-għaqda Ħamrun Ħanin u l-inizjattiva tagħhom Sports Unity, qed jagħtu kontribut kbir biex dan il-Mobile Unit jilħaq kemm jista’ jkun nies. L-isport dejjem kien mezz biex jinħoloq impatt soċjali pożittiv, u permezz ta’ din il-kollaborazzjoni, qed nesploraw modi ġodda kif intejbu l-għarfien dwar is-saħħa fi ħdan il-komunitajiet.
Lejn Soċjetà Aktar Infurmata u B’Saħħitha
Il-kanċer huwa realtà li tħalli impatt qawwi mhux biss fuq il-persuni milquta, iżda wkoll fuq il-familji u l-ħbieb tagħhom. Il-proċess tal-kura u l-irkupru huwa wieħed diffiċli u jista’ jħalli impatt emottiv serju. Għalhekk, l-edukazzjoni dwar il-prevenzjoni hija tant importanti – biex nipprevjenu l-uġigħ u l-ansjetà li huma konsegwenza tal-marda.
Dan il-Mobile Unit huwa pass ieħor ’il quddiem f’missjoni usa’ li għandha l-Malta Cancer Research and Innovation Hub: li tingħata prijorità lir-riċerka u li nkomplu nwasslu informazzjoni valida u sempliċi li tista’ tinftiehem mill-pubbliku. L-għan tagħna huwa li kull persuna f’Malta u Għawdex tkun mgħammra bl-għodda meħtieġa biex tieħu deċiżjonijiet infurmati dwar saħħitha.
Nemmen bis-sħiħ li, bil-kollaborazzjoni bejn il-Gvern, il-komunità xjentifika u ċ-ċittadini, nistgħu nkomplu nsaħħu din il-battalja kontra l-kanċer. Għalhekk, inħeġġeġ lil kulħadd biex jieħu l-opportunità li jżur il-Mobile Unit u jieħu vantaġġ mill-informazzjoni u s-servizzi li se jkun qed joffri. L-għarfien huwa s-saħħa, u flimkien nistgħu nkomplu nibnu futur aktar b’saħħtu għal kulħadd.
