L-Għaqda tal-Konsumaturi tirreferi għal rapporti li dehru fil-media li l-kumpaniji Vodafone Malta u Melita Ltd ser jingħaqdu f’kumpanija waħda.
l-Għaqda tal-Konsumaturi ma taqbilx ma’ dan u għalhekk kitbet lill-MCCAA, ir-regolatur li jrid japprova din l-għaqda bejn dawn iż-żewġ kumpaniji.
Ir-raġuni hi waħda ovvja. Is-suq tat-telefonija, internet u tv diġà hu dominat minn tliet kumpaniji bil-konsegwenza li l-konsumaturi Maltin prattikament m’għandhomx għażla. Hu minħabba f’hekk li l-konsumaturi Maltin qed ikollhom iħallsu prezzijiet għoljin ħafna meta kkomparati ma’ konsumaturi oħra Ewropej. Mhux talli hekk, talli n-nuqqas ta’ kompetizzjoni wassal biex il-kwalità tas-servizzi tonqos u mhux togħla.
Fl-ittra li bagħtet lill-MCCAA, l-Għaqda barra li poġġiet il-pożizzjoni tagħha ċara, infurmat lill-MCCAA li waqt li tkun qed tara jekk tapprovax dan, għandha tagħmel eżerċizzju sabiex turi l-impatt ta’ din l-għaqda fuq il-konsumaturi Maltin, speċjalment kif il-prezzijiet tas-servizzi li semmejna aktar ‘il fuq.
Dan l-eżerċizzju għandu jkun ippubblikat biex il-konsumaturi jkunu jafu bl-impatt u b’hekk l-MCCAA tkun kontabbli.
L-Għaqda infurmat lill-MCCAA li jekk hi tasal biex tapprova din l-għaqda bejn dawn iż-żewġ kumpaniji, il-konsumaturi għandhom jingħataw iċ-ċans li jinħallu mill-kuntratti li għandhom ma’ dawn iż-żewġ kumpaniji biex jiġi assigurat li dawn il-konsumaturi għallanqas ikollhom għażla biex jagħżlu bejn din il-kumpanija ġdida u l-kumpanija l-oħra li jkun fadal fis-suq.
Barra dan, l-MCCAA għandha kull sentejn tippubblika studju fejn turi dak li sabet wara li tkun studjat is-suq kif qed jaġixxi, kif il-prezzijiet ikunu ċċaqilqu u kif dawn jikkomparaw ma’ pajjiżi oħra fl-Unjoni Ewropea.
L-Għaqda tfakkar li s-swieq ikunu ta’ benefiċċju sew għall-konsumaturi u sew għall-ekonomija jekk ikun hemm kompetizzjoni li taħdem. Jekk ma jiġix assigurat dan, nerġgħu niġu għas-sitwazzjoni bħal ma konna qabel fejn il-prezz kien jiġi iffissat mill-Gvern, biss din id-darba la jkollna trasparenza u lanqas kontabilita’.
