Id-Deputat Nazzjonalista Mark Anthony Sammut ikkonferma li l-għaqda Repubblika u l-Partit Nazzjonalista huma ħaġa waħda.
Dan wara li l-Erbgħa filgħaxija l-għaqda estremista, permezz tal-President Onorarju tagħha Robert Aquilina, organizzat protesta bit-tattiċi antikwati tal-borom u s-sfafar u, f’waqtha, il-Kap tal-Partit Nazzjonalista Bernard Grech mar idur mal-ftit nies li kienu preżenti.
Meta d-Deputat Mark Anthony Sammut ġie mistoqsi waqt konferenza tal-aħbarijiet il-Ħamis waranofsinhar dwar jekk appoġġjax din l-istess protesta, hu tenna li l-għaqda Repubblika appoġġjat il-pożizzjoni tal-Partit Nazzjonalista.
“Naturalment il-protesta tar-Repubblika kienet qed tappoġġja pożizzjoni li ħa l-Partit Nazzjonalista fil-Parlament.”
Id-deputat Nazzjonalista Mark Anthony Sammut
U minkejja li l-Partit Nazzjonalista jibqa’ jħambaq li l-għaqda Repubblika ma tagħmilx parti mill-fazzjoni estremista tiegħu, bl-Avukat tal-għaqda Repubblika jkun l-eks Deputat Nazzjonalista Jason Azzopardi, Mark Anthony Sammut biddel id-diska u reġa’ tenna l-istess diskors, li din l-għaqda qegħda wara l-Partit Nazzjonalista.
“Il-protesta kienet qed tappoġġja proprju l-pożizzjoni tal-Partit Nazzjonalista.”
Id-deputat Nazzjonalista Mark Anthony Sammut
Waqt il-protesta, dawk preżenti barra l-Parlament infexxew jgħajtu, iħabbtu fuq il-borom bil-kuċċaruni u jonfħu s-sfafar għal kontra r-riforma fl-inkjesti maġisterjali, riforma li għaddiet forma ta’ liġi biex taqta’ l-abbużi mill-għodod tal-ġustizzja, kif kien qed jagħmel Jason Azzopardi stess.
Fil-protesta wkoll tkellem in-Nutar tal-Kurja Robert Aquilina, li jiġi ħu l-Kap de facto Nazzjonalista Karol Aquilina.
