L-Għaqda Mużikali Immakulata Kunċizzjoni tal-Ħamrun illum żaret lit-tfal li bħalissa jinsabu rikoverati fl-isptar Mater Dei, fis-swali Fairyland, Wonderland u Disneyland. Dan sabiex f’dan iż-żmien ta’ festi li sfortunatament kellhom iqattgħu fl-isptar, l-għaqda mużikali tferraħ lit-tfal u l-ġenituri tagħhom.
Mad-daqq tal-banda b’innijiet tal-Milied spikka wkoll il-Father Christmas u martu, flimkien mal-elves tagħhom, li wkoll taw xi rigali lit-tfal tas-swali.
Din l-attività saret bl-għajnuna tal-grupp Armar Festa Immakulata Kunċizzjoni, kif ukoll bl-għajnuna tal-Kappillan Fr. Franco Fenech.
L-Għaqda Mużikali Immakulata Kunċizzjoni tal-Ħamrun irringrazzjat lill-parruċċani kollha li għażlu li jagħtu rigali minn tagħhom sabiex jitqassmu ma’ dawk li huma fil-bżonn.
