Bħal lum xahar il-poplu vvota, vvota għal Gvern Laburista b’maġġoranza assoluta ta’ 55.04%. Jiġifieri b’35,280 vot. Dan ifisser li l-Partit Laburista kompla jżid aktar voti dan hekk kif l-aħħar elezzjoni ntrebħet b’35,107 vot.
Biex illum il-Gvern qed jitmexxa mill-Prim Ministru Joseph Muscat u fil-Parlament għandna jirrappreżentawna aktar membri Parlamentari żgħażagħ li qed narawhom għall-ewwel darba fil-Parlament Malti.
Matul dan ix-xahar Gvern Laburista diġà beda jwitti t-triq biex dak imwiegħed fil-manifest elettorali jibda jiġi mwettaq.
Fil-fatt din il-leġiżlatura fetħet b’diskussjoni dwar żwieġ indaqs li għandha twassal biex sa qabel il-waqfa tas-sajf, il-Parlament ikun addotta l-bidliet neċessarji fil-liġi sabiex koppji tal-istess sess ikunu jistgħu jiżżewġu hawn Malta.
Il-Prim Ministru wiegħed li l-Gvern Laburista se jkompli jaħdem bla heda sabiex is-soċjetà Maltija tkompli tiżviluppa bħala soċjetà miftuħa u fejn fiha kull persuna tkun trattata indaqs mingħajr distinzjoni abbażi ta’ xi karatteristika jew oħra.
L-Abbozz intitolat Att tal-2017 li jememda l-Att dwar iż-Żwieġ u Liġijiet oħrajn jagħmel proprju dan billi jkompli jibni fuq il-kisbiet li diġà għamel il-Gvern Laburista permezz ta’ liġijiet bħal dik tal-unjoni ċivili, il-liġi dwar l-identità tal-ġeneru u dik kontra l-prattiċi ta’ konverżjoni.
Il-Gvern kompla jibnu ukoll fuq il-ħidma tiegħu fejn jidħol il-qasam tal-housing soċjali. Fil-fatt, ftehim ta’ aktar minn €50 miljun iffirmat fil-Ministeru tal-Finanzi bejn il-Gvern Malti, il-Bank Ewropew għall-Investiment, u l-Council of Europe Development Bank, se jfisser l-iżvilupp ta’ 680 appartament għal dawk l-aktar vulnerabbli.
L-appartamenti se jkunu mifruxa fuq sittax-il sit madwar Malta f’Ħ’Attard, f’Ħal Luqa, fis-Siġġiewi, fil-Qrendi, f’Birkirkara, fl-Imsida, fiż-Żurrieq, f’Ħal Kirkop, f’Bormla, fin-Naxxar u f’Ħaż-Żebbuġ.
Ix-xogħlijiet diġà bdew fuq is-siti f’Ħaż-Żebbuġ, f’Ħ’Attard u f’Ħal Kirkop, u l-appartamenti se jvarjaw minn dawk b’kamra tas-sodda waħda, oħrajn b’żewġ kmamar tas-sodod u oħrajn bi tlieta.
Bdiet tieħu l-ħajja ukoll il-proposta fis-settur tas-saħħa li fi żmien tliet snin se tara l-mediċini tal-kanċer kollha fuq il-Formularju tal-Gvern.
Il-mediċina Mitomycin-C, li tintuża fuq pazjenti bil-kanċer fil-bużżieqa tal-awrina qed tingħata b’xejn.
Mediċina li mhux biss se tfisser aktar flus fil-but għall-pazjenti Maltin u Għawdxin, iżda se ġġib magħha benefiċċji ta’ saħħa wkoll; hekk kif tnaqqas iċ-ċans li l-kanċer jinfirex bin-nofs.
Huwa stmat li b’din il-miżura, li se tiswa lill-Gvern mal-€250,000 fis-sena, se jgawdu mat-300 pazjent kull sena.
Komplew ukoll l-impenji marbuta mal-Presidenza tal-Kunsill tal-Unjoni Ewropea li ġiet fi tmiemha ftit tal-jiem ilu. Presidenza li matula pajjiżna għamel kisbiet kbar, bil-ġurnal politico jgħid li l-Presidenza Maltija hija “A tough act to follow“.
