Aktar ma jmur qegħdin jiżdiedu l-istediniet mingħand nisa, jew irġiel jippreżentaw lilhom infushom ta’ mara, biex ikunu ħbieb tagħna fuq Facebook. Xi wħud mill-istediniet jispiċċaw b’togħma qarsa għax jiżviluppaw f’theddid.
one.com.mt jinsab infurmat li l-Pulizija Maltija qed tirċievi medja ta’ bejn żewġ u tliet rapporti fil-ġimgħa mingħand persuni, ħafna minnhom irġiel, li jibdew konverżazzjonijiet magħhom, ikomplu bi kliem sabiħ li jisseduċi u ġeneralment jispiċċaw jixegħlu l-kameras u jinżgħu jew jimmasturbaw quddiem il-parti l-oħra b’din tal-aħħar tirrekordja.
Hawnhekk jibdew problemi serji għax jibda t-theddid u tidħol l-attitudni ta’ “jew tħallasni, jew inxerred il-filmati u r-ritratti ma’ sħabek tal-facebook, inkluż ma’ martek u wliedek.”
Persuna li għaddiet minn esperjenza qarsa tkellmet ma’ one.com.mt u qalet li se ttiha rasha bl-inkwiet.
“Talbitni €200, ħallastha. Imbagħad talbitni €2,000 oħra, għidtilha li ma nistax inħallas dawk il-flejjes. Imma kompliet thedded. Rajt kif għamilt u ħallastha. Imbagħad talbitni ħamsa oħra. Ovvjament ħallejtha mingħajrhom u xerditli l-filmat tiegħi nimmasturba. Tista’ timmaġina l-mistħija li ħassejt quddiem it-tifla u l-barax t’inkwiet li ġabitni mal-mara.”
Dwar din ir-realtà tkellimna mal-President tal-Police Officers’ Union, l-Ispettur Sandro Camilleri u għamel diversi appelli.
“Ma tiċċettjax ma’ nisa li ma tafhomx, iktar u iktar tinżgħalhom. Lanqas ma’ min tafhom dawn l-affarjiet aħseb u ara ma nies li ma tafhomx. Ejja nkunu maturi u ma nivvintawx dawn il-ħniżrijiet. Jekk tinqala’ xi ħaġa bħal din, tagħtix flus, għax kif tagħti l-flus, ovvjament se jitolbuk aktar u se tispiċċa qisha bħal tal-użura. U trid iddaħħal rapport mal-Pulizija.
Fi kliemu jkun hemm ċirkostanzi fejn il-profili jkunu foloz u mingħalik li tkun qed titkellem ma’ Żvediża jew Franċiża, u minflok, warajh ikun hemm raġel jew xi ħadd mill-Fillippini. Għaldaqstant, temm jgħid Camilleri, mhux dejjem tkun faċli għat-Taqsima tas-Cyber Crime biex jagħlqu l-account tal-parti l-oħra u jgħinu lill-vittmi biex ma jinxtered l-ebda filmat.
https://youtu.be/C_HuBNJwPOk
