Is-sitt laqgħa bejn il-mexxejja tal-pajjiżi tan-Nofsinhar tal-Unjoni Ewropea, dak iż-żmien imsejħa bħala MED 7, saret f’Malta fl-14 ta’ Ġunju tal-2019.
F’dik il-laqgħa kien hemm preżenti l-mexxejja minn seba’ pajjiżi tal-Unjoni Ewropea, li jinsabu fir-reġjun tal-Mediterran, fosthom il-President Franċiż Emmanuel Macron, il-Prim Ministru Spanjol Pedro Sanchez, il-Prim Ministru Portugiż António Costa, il-President Ċiprijott Nicos Anastasiades, il-Prim Ministru Grieg Alexis Tsipras u l-Prim Ministru Taljan ta’ dak iż-żmien Giuseppe Conte.
Dakinhar il-mexxejja ntlaqgħu fi Pjazza Kastilja mill-Prim Ministru Malti ta’ dak iż-żmien, Joseph Muscat.
Fil-laqgħa li saret fil-Berġa ta’ Kastilja, il-mexxejja Ewropew tar-reġjun tal-Mediterran iddiskutew bosta temi, fosthom dawk ekonomiċi, il-migrazzjoni, l-ambjent, is-sigurtà u l-paċi f’dan ir-reġjun. Hawnhekk is-seba’ mexxejja tal-pajjiżi tan-Nofsinhar tal-Unjoni Ewropea sostnew li l-instabilità fil-Libja kienet theddida għall-Unjoni.
Dan is-summit f’pajjiżna sar fi żmien meta l-istituzzjonijiet Ewropej kienu għaddejjin fl-eqqel tad-diskussjoni dwar il-futur tal-Ewropa, fi żmien in-negozjati biex, f’Jannar ta’ sena wara, ir-Renju Unit joħroġ mill-Unjoni Ewropea – l-ewwel stat membru li qatt għamel dan sa mit-twaqqif tagħha.
Fil-bidu ta’ dan is-Summit, l-eks Prim Ministru Joseph Muscat sostna li f’dan il-kuntest għandu jkun żgurat li r-reġjun tal-Mediterran għandu jkun parti mit-teħid tad-deċiżjonijiet fuq livell Ewropew.
Dwar il-paċi, Malta sostniet fuq id-diskors li għamel l-eks Prim Ministru Malti, Dom Mintoff, waqt il-Konferenza dwar is-Sigurtà u l-Koperazzjoni fl-Ewropa, li saret fil-kapitali tal-Finlandja, Helsinki, f’Lulju ta’ ħamsin sena ilu. F’din il-konferenza, il-Perit Mintoff kien sostna li “ma jistax ikun hemm paċi fl-Ewropa, jekk ma jkunx hemm paċi fil-Mediterran.” Dan hekk kif bil-paċi biss jista’ jkun hemm stabilità fl-Ewropa.
Dwar l-ekonomija, pajjiżna sostna li xogħol l-Unjoni Ewropea hu li jiġu salvagwardjati d-drittijiet taċ-ċittadini u għandha tinħoloq strateġija għal aktar tkabbir ekonomiku biex jinħoloq iżjed xogħol. Madankollu, dan it-tkabbir għandu jkun wieħed sostenibbli minħabba l-isfida tat-tibdil fil-klima.
Dwar il-migrazzjoni, il-mexxejja saħqu dwar l-importanza li tintrefa’ r-responsabilità ta’ dan il-fenomenu. Erba’ snin ilu, dawn il-mexxejja saħqu li għandu jkun hemm mekkaniżmu permanenti f’dan il-kuntest li jkun ibbażat fuq il-prinċipji ta’ responsabilità u solidarjetà.
Fi tmiem din il-laqgħa, f’konferenza tal-aħbarijiet fi Pjazza Kastilja, is-seba’ mexxejja ffirmaw id-Dikjarazzjoni ta’ Valletta – ftehim konġunt fuq 29 prinċipju li fuqhom intlaħaq qbil.
Fost il-qbil kien hemm dwar it-tkattir tas-suq uniku bil-għan li l-innovazzjoni twassal għat-tkabbir ta’ dawn il-pajjiżi.
Il-mexxejja Ewropej iddikjaraw ukoll l-appoġġ tagħhom għal Ċipru, hekk kif fiż-żmien meta tlaqqgħet din il-laqgħa, kien għaddejja kwistjoni mat-t-Turkija, hekk kif il-pajjiż tal-aħħar kien qed iħaffer għal gass. Il-mexxejja talbu biex ikunu rrispettati l-liġijiet internazzjonali u biex ikun hemm relazzjonijiet tajbin bejn il-pajjiżi tar-Reġjun tal-Mediterran.
