Fl-ewwel kwart ta’ din is-sena, it-turisti li ġew f’pajjiżna qabżu l-għadd ta’ dawk li ġew fl-ewwel kwart tal-2019, meqjusa l-aqwa sena għat-turiżmu f’Malta. Dan jagħmel l-ewwel kwart tal-2023 bħala l-aqwa kwart ta’ sena fl-istorja tat-turiżmu f’pajjiżna.
Juru dan ċifri mill-Awtorità Maltija għat-Turiżmu li tħabbru f’konferenza tal-aħbarijiet, it-Tnejn filgħodu, permezz ta’ preżentazzjoni mill-Kap Eżekuttiv tal-MTA, Carlo Micallef.
F’din il-konferenza tħabbar li, fl-ewwel kwart tas-sena waslu f’pajjiżna, 443,191 turist: żieda ta’ 4.1% meta wieħed iqabbel mal-2019. Dak iż-żmien waslu f’pajjiżna 425,892 turist.
TURISTI FL-EWWEL KWART TAS-SENA
2023 = 443,191 TURIST
2019 = 425,892 TURIST
ŻIEDA TA’ 4.1%
L-għadd ta’ ljieli mqattgħin f’pajjiżna wkoll żdied meta mqabbel mal-2019. Filwaqt li, fl-ewwel kwart tal-2019, it-turisti f’pajjiżna qattgħu 2,798,282 lejl, fl-istess perjodu fl-2023 it-turisti qattgħu f’pajjiżna 2,905,527 lejl: żieda ta’ 3.8%. Meta dan l-għadd ta’ ljieli jitqabbel mal-istess perjodu fl-2022, tiġi rreġistrata żieda ta’ kważi 60%.
L-ispiża totali tat-turisti f’pajjiżna f’dan il-perjodu qabżet it-€312-il miljun ewro: żieda ta’ 14.7% fuq l-2019. F’dak il-perjodu ntefqu ftit aktar minn €272 miljun.
Ġiet irreġistrata wkoll żieda fl-ispiża ta’ kull turist b’mod individwali.
Filwaqt li fl-2019 kull turist nefaq mas-€640 f’pajjiżna, din is-sena t-turisti nefqu €705: żieda ta’ aktar minn 10%. Għal kull lejl f’pajjiżna, ntefqu kważi €110 minn kull turist fl-ewwel tliet xhur ta’ din is-sena: żieda ta’ 10.5% fuq l-istess perjodu fl-2019. Dak iż-żmien kienu qed jintefqu mas-€97.
Min-naħa tiegħu, iċ-Chairman tal-Awtorità Maltija għat-Turiżmu, Gavin Gulia, sostna s-sodisfazzjon tiegħu għal dawn ir-riżultati pożittivi. Huwa rrimarka li dan is-suċċess wasal frott ħidma sfiqa mill-imsieħba kollha fil-qasam.
Ma’ ONE News, Gulia semma l-aspetti prinċipali li wasslu għal dan is-suċċess.
“Naturalment, aħna qegħdin nagħmlu użu aħjar mill-capacity li għandna f’dak li għandu x’jaqsam ma’ airlines. Naturalment, qed inkunu aktar aggressivi ma’ dak li għandu x’jaqsam ma’ kumpaniji tal-marketing. Però, fuq kollox, għandna prodott diversifikat ħafna. Allura t-turist li qed iżur pajjiżna qiegħed jitpaxxa, għax qed ikollu esperjenza ħolistika.”
Il-Ministru għat-Turiżmu, Clayton Bartolo, sostna li dan it-tragward jikkonferma li l-ħidma fil-qasam tat-turiżmu miexja fid-direzzjoni t-tajba.
Huwa sostna l-bżonn li dan it-tkabbir jibqa’ jiġi sostnut filwaqt li jiġi assigurat li jiġu priservati r-riżorsi naturali u kulturali ta’ pajjiżna: aspetti li jagħmlu lil pajjiżna daqshekk attraenti għat-turisti li jagħżlu lil Malta bħala d-destinazzjoni tagħhom.
“Dan kollu se jkun pjattaforma għall-kumplament tas-sena, fejn qed naraw li għandu jkollna sena tajba ħafna sabiex b’hekk inkomplu nagħtu sostenn lil din l-industrija u nkomplu nagħtu iżjed opportunitajiet għall-futur.”
