Fi tmiem il-ġimgħa li ġej is-sewwieqa Maltin se jkunu jistgħu jibdew isuqu fuq l-ewwel strutturi tal-flyovers tal-proġett tal-Marsa.
Fi stqarrija, Infrastruttura Malta qalet li ż-żewġ flyovers flimkien ikopru distanza ta’ madwar nofs kilometru u dawk li se jużaw it-toroq se jkollhom rotta diretta bejn il-Marsa u Ħal Luqa flok dik eżistenti mit-traffic lights ħdejn iċ-Ċimiterju tal-Addolorata.
Waqt żjara li crew ta’ one news għamel fuq is-sit tal-proġett, stajna nosservaw li bħalissa għaddejjin l-aħħar xogħlijiet fosthom it-twaħħil tal-barrikati u s-sinjali tat-toroq.
Dan wara li fl-aħħar tal-ġimgħa l-oħra beda jingħata t-tarmak fuq din l-istruttura li ħadet is-sura tagħha f’anqas minn sena.
Infrastruttura Malta qalet li għall-ewwel din il-flyover li għandha żewġ korsiji se tintuża bil-kontra. Dan ifisser li s-sewwieqa se jsuqu fid-direzzjoni lejn in-Nofsinhar, minn Triq Aldo Moro, il-Marsa lejn Triq Giuseppe Garibaldi, Ħal Luqa.
Dan sakemm kmieni s-sena d-dieħla jinfetħu wkoll it-tielet u r-raba’ flyovers ta’ dan il-proġett,
Dan se jsir biex Infrastruttura Malta tkun tista’ tagħlaq temporanjament it-toroq li bħalissa qegħdin iservu għal din ir-rotta, fl-inħawi tal-parkeġġ tal-Addolorata, ħalli tkompli tibni l-istrutturi l-oħrajn tal-proġett.
Dawn jinkludu t-tielet u r-raba’ flyovers, li qegħdin jinbnew taħt iż-żewġ flyovers li Infrastruttura Malta se tiftaħ fi tmiem il-ġimgħa, biex jiffurmaw iż-żewġ korsiji li għandhom jgħaqqdu r-rotta tan-Nofsinhar, minn Triq Aldo Moro lejn Triq Garibaldi.
Il-flyovers li se jiftħu fi tmiem il-ġimgħa, imbagħad se jibdew jintużaw fir-rotta lejn it-Tramuntana, biex b’hekk tkun kompluta l-konnessjoni f’żewġ direzzjonijiet, bejn dawn iż-żewġ toroq arterjali.
Infrastruttura Malta appellat lis-sewwieqa biex meta jivvjaġġaw minn din il-junction fil-jiem li ġejjin, isegwu s-sinjali sofor li jiggwidawk għar-rotta l-ġdida fid-direzzjoni tan-Nofsinhar, minn fuq il-flyovers.
Qalet li l-limitu ta’ veloċità se jkun ta’ 30 kilometru fis-siegħa u se jibqa’ fis-seħħ għall-inħawi kollha tal-Marsa Junction Project, inkluż meta tgħaddi minn fuq l-istrutturi ġodda tal-flyovers.
Is-seba’ flyovers tal-Marsa Junction Project b’investiment ta’ 70 miljun ewro għandhom l-għan li jeliminaw it-traffic lights ta’ ħdejn l-Addolorata, u joħolqu aktar minn 12-il kilometru ta’ korsiji ġodda li se jgħaddu b’mod separat minn fuq xulxin fi tliet livelli differenti.
