Il-festival internazzjonali tal-arti, maltabiennale.art, li qed jiġi organizzat għall-ewwel darba f’pajjiżna s-sena d-dieħla, irċieva total ta’ 2,527 proposta ta’ arti kontemporanja minn artisti interessati li jieħdu sehem minn 75 pajjiż differenti.
Jirriżulta li artisti diġà stabbiliti u famużi internazzjonali, wieġbu għas-sejħa biex jieħdu sehem fil-maltabiennale.art, li fl-aħħar jiem saħansitra ngħata rikonoxximent mill-fergħa tal-Ġnus Magħquda, il-UNESCO.
Dan il-festival prestiġjuż, li jattira l-eluf kbar ta’ viżitaturi kull sena kull fejn isir, se jkun qed isir f’pajjiżna bejn il-11 ta’ Marzu u tmiem Mejju tal-2024 u se jkun mifrux madwar Malta u Għawdex f’diversi siti storiċi li huma amministrati minn Heritage Malta.
Is-sejħa internazzjonali għalqet nhar il-Ġimgħa li għadda f’nofsinhar, biex fil-jiem li ġejjin jibda l-proċess tal-għażla minn tim kuratorjali internazzjonali mmexxi mid-Direttriċi Artistika Sofia Baldi Pighi, biex jiġi deċiż liema mill-proposti se jagħmlu parti mill-maltabiennale.art. Il-proċess għandu jintemm sa Ottubru li ġej.
Il-wirja ewlenija tal-arti se tkun esebita f’bosta postijiet u siti storiċi ta’ Heritage Malta fil-Belt Valletta u l-Birgu f’Malta u fix-Xagħra u fiċ-Ċittadella, Għawdex.
Il-maltabiennale.art se tingħata tema Mediterranja, bl-isem ‘Baħar Abjad – Imsaġar taż-Żebbuġ’, li fiha se jiġu ttrattati erba’ temi partikolari permezz tal-arti.
Il-ġimgħa li għaddiet, meta sar magħruf li l-UNESCO tat il-patrunaġġ tagħha lil dan il-festival tal-arti, ONE News tkellem mal-President tal-Maltabiennale.art u Chairman ta’ Heritage Malta, Mario Cutajar.
Qal, “Għaliex il-UNESCO deherilha li għandha tagħti dan ir-rikonoxximent? Dan ir-rikonoxximent tatu l-patrunaġġ tagħha għar-raġuni li dan il-Biennale jorbot mal-għanijiet li għandha l-UNESCO. Jorbot mal-għanijiet tagħha li, permezz tal-kultura, permezz tal-arti, jiddjalogaw f’dan il-każ fil-Mediterran, il-problemi tal-Mediterran il-kulturi, aspetti mill-kulturi tal-Mediterran, għax ta’ bilħaqq nifhmu li, bl-arti, in-nies jitkellmu aħjar.”
Il-maltabiennale.art qed ikun organizzat minn Heritage Malta permezz ta’ MUŻA, il-mużew nazzjonali tal-arti fil-komunità, b’kollaborazzjoni mal-Kunsill Nazzjonali tal-Arti u tal-entitajiet Malta Libraries u Valletta Cultural Agency, Spazju Kreattiv, VisitMalta u l-Ministeri għall-Affarijiet Barranin, għal Għawdex u għall-Wirt Nazzjonali, l-Arti u l-Gvern Lokali.
