Matul din il-ġimgħa l-Membri Parlamentari Ewropej se jkunu qed jivvutaw fuq l-allokazzjoni ta’ airslots fl-ajurporti. Fid-dawl ta’ dan il-vot krucjali, l-Ewro-Parlamentari Malti Alex Agius Saliba qiegħed jitlob l-appoġġ tal-kollegi Ewro-Parlamentari sabiex il-linji tal-ajru jkollhom id-dritt li jzommu l-airslots għas-Sajf kollhu u mhux sat-30 ta’ Gunju, hekk kif qed tipproponi l-Kummissjoni Ewropeja.
“L-imxija tal-COVID19 qed ikollha impatt qawwi ħafna kemm fuq l-industrija tal-avjazzjoni internazzjonali u anke dik Ewropeja. Qed ngħixu f’mumenti straordinarji. Din il-sitwazzjoni se tkun l-ewwel waħda tax-xorta tagħha ghall- AirMalta f’45 sena servizz”, qal Agius Saliba.
Huwa kompla jgħid li minħabba li din is-sitwazzjoni taf tkun waħda li ttul numru ta’ ġimgħat l-AirMalta għandu jkollha rinunzja tar-regola magħrufa bħala l-80-20 taħt ir-regolament tal-islots. Din ir-regola, magħrufa aħjar bħala r-regola tal-‘use-it-or-lose-it’, timponi fuq il-linji tal-ajru sabiex jużaw l-islots li kienu allokati għalihom sabiex ma jitilfux dan id-dritt mogħti lilhom għas-snin ta’ wara.
Din il-pandemija ħolqot sitwazzjoni fejn l-AirMalta tista’ titlef l-islots tagħha, fosthom f’ ajurporti bhal Heathrow, Fiumicino, Orly, Charles De Gaulle, Berlin Tegel u Ginevra fost l-oħrajn. Dan sakemm ma toperax titjiriet vojta, xi ħaġa li żgur mhux sostenibbli għall-AirMalta, għaċ-ċittadini Maltin u wisq aktar għall-ambjent. Barra minn hekk bl-ajruporti jagħlqu kuljum, din m’ ghadiex iktar għażla li tista ssir. ”
L-Ewro-Parlamentari Agius Saliba saħaq li f’dawn il-mumenti straordinarji fid-dawl tal-imxija tal-COVID-19 hemm bżonn li dawn l-istess regoli jkunu ffriżati u temporanjament sospiżi.
Alex Agius Saliba stqarr li huwa qiegħed jilqa’ l-proposti tal-Kummissjoni Ewropeja fuq l-avjazzjoni u l-ambjent fid-dawl ta’ din il-pandemija u b’hekk jħeġġeġ lill-sħabu l-kollegi Ewro-Parlamentari biex jappoggjaw it-talba tieghu.
Huwa temm jgħid li fid-dawl li għad m’hemmx visibiltà ċara ta’ meta se tkun qed tiġi fi tmiemha din il-kriżi, ghandha tigi kkunsidrata ukoll il-possibilità li din l-eżenzjoni tiġi estiża għall-istaġun tax-Xitwa.
