Il-Prim Ministru u mexxej Laburista Joseph Muscat qal li l-prinċipji tal-manifest elettorali approvat illum huma ċari għal kulħadd. Illum ingħata mandat qawwi ħafna, biex dawn il-prinċipji jitwettqu fil-leġiżlatura li jmiss.
Il-funzjoni tat-twettiq tal-manifest elettorali se tkun f’idejn il-Prim Ministru, bl-għajnuna ta’ Louis Grech bħala konsulent.
Huwa programm ambizzjuż, u t-triq għall-ħolma Maltija se tinbena flimkien, jekk il-poplu jafda amministrazzjoni Laburista mill-ġdid. Triq ambizzjuża u li bdiet erba’ snin ilu. “M’hemmx dubju li mhux se tkun faċli” qal Joseph Musact. Xejn ma jiġi waħdu, imma se tkompli tibdel il-pajjiż.
L-ewwel priorità hi li jinħoloq il-ġid. Ingħatat prova kif dan il-Gvern jista’ jkun ikkunsidrat bħala wieħed li l-aktar ħoloq ġid.
“Kburi li flimkien ma’ sħabi mexxejt” qal Joseph Muscat, u semma’ l-oqsma kollha fejn Gvern Laburista mexxa ‘l quddiem dan il-pajjiż. Il-ħsieb pożittiv huwa dak li dan il-manifest irid inissel.
“Nitlobkom l-għajnuna u l-appoġġ biex inwettqu flimkien” qal Muscat. Huwa pjan bi ħsieb, mhux faċli, imma costed. Pjan bi proposti ċari u konkreti. Jekk b’Malta tagħna lkoll ġibna bidla tant kbira, dan huwa manifest li se jwassal għal qabża kbira fil-manifest. Mhux xogħol li sar fi tliet ġimgħat, imma beda erba’ snin ilu.
Xogħol mimli proposti li huma mibnijin minn dak li amministrazzjoni Laburista għaddiet minnu tul l-aħħar snin. Huwa pjan li bdiet il-ħdima dwaru mill-ewwel ġurnata.
Issa ingħaqad element ieħor; l-esperjenza. Il-poplu għandu l-esperjenza ta’ Gvernijiet preċedenti li jwiegħed u ma jwettaqx. Il-Partit Laburista jżomm kellmtu.
Ix-xogħol huwa l-bażi għaliex inħoloq il-moviment. Dan huwa l-moviment tax-xogħol, u se jibqa’ jkun pro-business. Iżda qed jinġiebu wkoll aktar drittijiet u kundizzjonijet għall-ħaddiema. L-infrastruttura m’għadhiex biżżejjed biex issostni s-suċċess ekonomiku Malti. Dan il-pjan jinkludi ammont bla preċedent ta’ inizjattivi li se jwasslu għal qabża enormi.
“Kemm jien kburi bir-riżultati li ksibna” qal Joseph Muscat. Mhux biss fejn jidħol surplus u riżultati ekonomiċi mingħajr awsterità. Imma anke l-fatt li naqas il-faqar bin-nofs tul din il-leġiżlatura. Kisba li tiżboq kull surplus. Kburi wkoll, qal il-Prim Ministru, bin-nies ta’ kuraġġ li tkellmu llejla.
Joseph Muscat qal li jrid jibqa’ jara liż-żgħażagħ mixjin ‘il quddiem. Il-ħolma Maltija se tibbaża l-aktar fuq il-kwalità tal-ħajja, u l-proposti huma bbażati fuq dan.
“Pajjiżna lest għal qabża kbira fil-kwalità” qal Muscat.
In-nies ixaqleb lejn it-tajjeb li sar, imma kien hemm fejn il-Partit Laburista fil-Gvern iddiżappunta. “Inbaxxu rasna għall-kritika tal-poplu” qal Muscat. Għalhekk se tkun qed tintuża id aktar severa fuq politiċi li jonqsu, bħal f’każijiet ta’ korruzzjoni.
L-ebda forza politika oħra fil-pajjiż ma tista’ tagħmel il-qabża liberali li jista’ jagħmel Parti Laburista, qal Joseph Muscat. L-ugwaljanza u x-xjenza jaħdmu id f’id, u filwaqt li l-għażliet ikunu etiċi, ikunu gwidati mir-raġun. Mill-fatt li l-poplu ma jistax jinżamm lura minħabba l-biża’ tal-klassi politika. Se jkun hemm forzi konservattivi li se jipprovaw ibeżżgħu lill-poplu.
Temm jitlob lil poplu jagħmel l-aqwa għażla. Hija elezzjoni bbażata fuq elementi diviżorji u fuq attakki minn naħa tal-Oppożizzjoni. “Xogħoli se jkun li ngħaqqad aktar minn qatt qabel”, tenna Muscat.
