L-Erbgħa jibda l-ġbir tad-dokumenti tal-vot mill-għasses tal-Pulizija ta’ kull lokalità.
Dan hekk kif fadal ħmistax fil-mija tad-dokumenti tal-vot li ma ġewx imqassma fl-ewwel fażi, fit-tqassim bieb bieb.
Kull min għadu ma ġabarx id-dokument tal-vot issa fadallu ċans biss sa nhar il-Ħadd li ġej biex jiġbru mill-lokalità tiegħu.
“Jistgħu jmorru jiġbru d-dokument tal-vot personalment mill-għassa tal-lokal fejn huma reġistrati. Dan il-proċess jibqa’ sejjer sa nhar il-Ħadd f’nofsinhar. Il-ħinijiet huma bejn it-8:00 u s-13:00 u bejn it-15:00 u d-21:00. Importanti li jieħdu l-karta tal-identità u jmorru huma personalment.”
Fil-lokalità ta’ San Pawl il-Baħar id-dokumenti tal-vot jistgħu jinġabru mill-għassa tal-Qawra u f’Wied il-Għajn mill-iskola Primarja ta’ San Ġwakkin.
Filwaqt li fil-lokalitajiet tal-Birgu, il-Kalkara, ix-Xgħajra, Ħal Kirkop, l-Iklin, Ħal Lija, Għargħur, Ta’ Xbiex, Pembroke, Ħ’Attard, Mellieħa, Fontana u l-Għasri, il-ġbir tad-dokumenti tal-votazzjoni ser isir mill-Uffiċċju tal-Kunsill Lokali, fl-istess ġranet u ħinijiet.
“F’din il-fażi int qed tiġbru mill-lokalità tiegħek. Wara din il-fażi tmur tiġbru min-Naxxar jew ir-Rabat Għawdex. Allura iżjed faċli li tmur tiġbru mill-lokalità tiegħek f’din il-fażi.”
Kull min għandu d-dokument tal-vot reġistrat fuq Għawdex u jixtieq li jinġieblu f’Malta, jew inkella viċi versa, jista jagħmel talba mal-Kummissjoni Elettorali permezz ta’ email fuq maltagozo.electoral@gov.mt.
Louis Gatt fakkar li dawk li se jkunu msefrin jew rikoverati fi sptar nhar is-26 ta’ Marzu, fadlilom ċans sa nhar il-Ġimgħa li ġej f’nofsinhar biex imorru jiffirmaw dikjarazzjoni ġuramentata u jivvutaw fil-votazzjoni bikrija tas-Sibt li ġej.
Wieħed jista’ jagħmel dan billi jmur fl-Uffiċċju tal-Kummissjoni Elettorali fin-Naxxar jew fir-Rabat Għawdex.
“Il-ħinijiet sabiex wieħed imur jifirma din id-dikjarazzjoni huma bejn it-08:00 u s-14:00 u bejn it-15:00 u t-20:00”
Intant, is-Sibt li ġej ukoll se ssir il-votazzjoni fid-djar tal-anzjani. Gatt qal kif id-dokument tal-vot tal-anzjani fid-djar tal-anzjani se jitqassam dakinhar stess. Iżda jista’ jkun li hemm sitwazzjoni li d-dokument tal-vot tal-anzjan jew anzjana laħaq tqassam f’xi residenza oħra u allura jinsab għand xi qarib.
“F’dak il-każ il-qarib tagħhom irid iwassal id-dokument tal-votazzjoni mhux aktar tard mit-tmintax ta’ Marzu jiġifieri jum qabel il-votazzjoni fid-djar tal-anzjani.”
Għal aktar informazzjoni wieħed għandu jagħmel kuntatt mall-Uffiċċju Elettorali tal-Partit Laburista fuq 20901531 jew 20901528.
