L-elettriku mix-xatt għall-vapuri fil-Port il-Kbir issa ġie estiż ukoll għat-tarzna ta’ Palumbo.
Dan hekk kif Infrastruttura Malta qed tibdel ir-rotta ta’ parti min-network ta’ cables ta’ vultaġġ għoli taħt l-art li se jwasslu l-elettriku.
Waqt żjara tal-Ministru għall-Infrastruttura u t-Trasport Ian Borg fit-Tarzna ta’ Palumbo flimkien ma’ numru ta’ uffiċjali tat-tarzna u ta’ Infrastruttura Malta, intqal kif l-aġenzija tat widen għal appelli li għamlu r-residenti tal-Kottonera biex it-tarzna f’Bormla wkoll tkun mgħammra b’din it-teknoloġija.
Għalhekk in-network ġdid tal-elettriku għal din is-sistema jaħseb ukoll għal Baċir Numru 6, l-ikbar baċir fit-tarzna, u għal Xatt il-Parlatorju biswitu. Din l-estensjoni se tkompli żżid il-benefiċċji ambjentali ta’ dan l-investiment f’Bormla u lokalitajiet oħrajn fil-Port il-Kbir.
Dwar dawn spjegatilna aktar il-Perit Janice Borg mit-Taqsima Marittima fi ħdan Infrastruttura Malta
“Bħala parti mir-rotta għaddejin ukoll minn ġewwa Palumbo bil-cables bil-ħsieb ukoll li fit-tieni parti tal-proġett inkunu anke nistgħu nagħtu shore supply lil Palumbo biex b’hekk il-vapuri kbar li jkunu qegħdin sorġuti fil-mollijiet jew fil-baċiri ta’ Palumbo jkunu wkoll jistħgu jaqbdu mal-grid nazzjonali u jitfu l-magni tagħhom.”
Hija spjegat ukoll l-andament tax-xogħlijiet li għaddejin.
“Bħalissa bħala xogħlijiet jiġifieri qed nagħmlu t-trinek u ovjament ngħaddu l-cables u s-servizzi li għandna bżonn ngħaddu minn dawn it-trinek biex fl-aħħar mill-aħħar se naslu f’Boiler Wharf fl-Isla.”
Minn naħa tiegħu l-Ministru Ian Borg sostna li l-proġett magħruf bħala shore to ship se jwassal għall-inqas tniġġis fl-inħawi tal-Port il-Kbir.
“Meta qed niffrankaw l-emmissjonijiet allura qed niffrankaw ħafna ħsara lill-komunitajiet tal-Port il-Kbir u għalhekk kif ta’ pjaċir għalija li nżur ix-xogħlijiet li għaddejin minn Infrastruttura Malta flimkien mas-Sindki u d-Deputati li jirrapreżentaw lin-nies tal-Kottonera u n-nies tal-madwar u allura nħarsu ’l quddiem li dawn ix-xogħlijiet itejbu l-kwalità tal-ħajja tan-nies li jgħixu mal-Port il-Kbir.”
Permezz ta’ dan il-proġett vapuri sorġuti fil-Port il-Kbir ikunu jistgħu jitfu l-magni tagħhom li jaħdmu bil-gass jew heavy fuel oil u minflok iqabbdu mas-sistema għall-provvista tal-elettriku li se jkun hemm fuq ix-xatt, sabiex iħaddmu l-makkinarju għas-servizzi kollha li jkun hemm bżonn jipprovdu waqt li jkunu weqfin fil-port.
B’dan l-investiment ta’ kważi ħamsin miljun ewro, Infrastruttura Malta qed tagħti arja aktar nadifa lil 17,000 familja li jgħixu madwar il-Port il-Kbir billi se tnaqqas b’aktar minn 90% t-tniġġis tad-dħaħen ta’ dawn il-vapuri.
S’issa Infrasturttura Malta lestiet sitta u tletin fil-mija mill-Infrastruttura ta’ dan in-network.
