“Oqbra mbajda.”
Kien dan il-kliem li għażel juża’ l-eks Deputat Nazzjonalista Mario Galea, għall-Grupp Parlamentari u t-tmexxija tal-Partit Nazzjonalista.
Dan b’reazzjoni għal mod ta’ kif l-istess Partit Nazzjonalista ta’ Bernard Grech issa qed jagħmel tiegħu d-deċiżjoni tal-Qorti Ċivili hekk kif il-Ġimgħa, annullat il-kuntratti marbuta mal-konċessjoni ta’ tliet sptarijiet u ordnat biex dawn l-isptarijiet jiġu ritornati lill-Gvern mill-Vitals Global Healthcare u Steward Healthcare.
Dan għall-kawża li ressaq ’il quddiem l-eks Kap Nazzjonalista, illum Deputat, Adrian Delia.
Propju sagħtejn wara li ngħatat id-deċiżjoni mill-Imħallef Francesco Depasquale, il-Partit Nazzjonalista tella’ konferenza tal-aħbarijiet b’Bernard Grech bħala kelliem ewlieni u l-Grupp Parlamentari Nazzjonalista kollu warajh.
L-istess ġara s-Sibt filgħodu hekk kif Grech u l-Partit li jmexxi, kompla jagħmel tiegħu din id-deċiżjoni mill-Qorti Ċivili.
Madankollu din ir-reazzjoni tal-Partit Nazzjonalista u l-mod ta’ kif qed jipprova jiggwadanja l-punti politiċi mill-kawża li ressaq ’il quddiem l-eks Kap Nazzjonalista, wasslet għall-għadab ta’ bosta.
Dan hekk kif fiż-żmien li Adrian Delia ressaq il-quddiem din il-kawża ċivili, huwa tħalla jagħmel dan waħdu, mill-Partit Nazzjonalista u l-establishment li baqa’ jiddomina fi ħdanu.
Delia stess kien ikkonferma dan fuq il-programm Iswed fuq l-Abjad, lura fl-2018 filwaqt li ONE News fl-istess żmien kien żvela kif għal din il-kawża Delia ma kisibx l-appoġġ tal-kumplament tal-Grupp Parlamentari tant li l-kawża kienet iġġib biss il-firma tiegħu.
Mhux talli hekk, talli fis-sajf tal-2020 Adrian Delia tqaċċat mit-tmun tal-Partit Nazzjonalista mill-Blue Heroes tal-establishment biex floku tpoġġa Bernard Grech.
Kienu propju dawn l-iżviluppi li ġabu l-għadab ta’ bosta partitarji Nazzjonalisti mill-fazzjoni ta’ Adrian Delia malli raw lill-Partit Nazzjonalista u l-Kap jagħmlu tagħhom id-deċiżjoni finali tal-Qorti Ċivili.
Fuq quddiem ta’ dawk li kritikaw kien hemm propju l-eks Deputat Nazzjonalista Mario Galea hekk kif sostna li min mar jippoppa sidru fil-konferenza tal-Partit Nazzjonalista, kienu l-istess nies li ħallew lill-Eks Kap waħdu meta ried li l-kawża ssir mill-Grupp Parlamentari Nazzjonalista.
Galea kompla jgħid kif dakinhar li Delia talab dan huwa sema’ b’widnejh il-biża’ minn bosta mill-Grupp Parlamentari tal-Partit Nazzjonalista, li Vitals jirreaġixxu u jfittxu lill-Partit Nazzjonalista.
Galea saħansitra sfida lil dawk li llum jappartjenu fil-Grupp Parlamentari tal-Partit Nazzjonalista sabiex jażżardaw jgħidu li dan mhux minnu.
Intant fl-istess dikjarazzjoni fuq Facebook, Mario Galea, indirizza lill-Kap Nazzjonalista nnifsu u bla tlaqlieq qallu sabiex jieqaf jieħu rikba b’xejn.
