Is-sena li għaddiet, pajjiżna ra tkabbir ekonomiku ta’ disgħa punt erbgħa fil-mija.
Dan ħareġ waqt il-preżentazzjoni tar-rapport annwali tal-Bank Ċentrali ta’ Malta, li saret l-Erbgħa filgħodu.
F’dan ir-rapport ħareġ kif pajjiżna għandu rata ta’ tkabbir ekonomiku ħafna iżjed mill-medja taż-żona tal-ewro. Dan hekk kif ir-rata ta’ Malta taqbeż ir-rata taż-żona tal-ewro b’iżjed minn erbgħa fil-mija.
Il-Gvernatur tal-Bank Ċentrali, Edward Scicluna, innota kif dan it-tkabbir seħħ minkejja li kaġun tal-pandemija kien hemm żmien meta ngħalqu l-ħwienet. Tkellem dwar kif dan it-tkabbir seta’ jseħħ għax pajjiżna kellu programm ta’ vaċċinazzjoni b’saħħtu.
Qal, “Dan kien importanti ħafna għall-ekonomija u għadha għaddejja b’dak li ngħidulu momentum. Dan importanti li nżommuh għax huwa l-għajn ta’ kull soluzzjoni tal-problemi. Aħna wkoll ixxurtjati wkoll, jekk nista’ ngħid hekk, għal fatt illi m’għandniex relazzjonijiet ekonomiċi mill-qrib mar-Russja, f’dak li huwa sors tal-enerġija, eċċetra. Dan ma jfissirx li ma nintlaqtux mill-effett li jkun hemm globali, jiġifieri nuqqas ta’ qmugħ u anki prezzijiet tal-enerġija.”
Fir-rapport, il-Bank Ċentrali nnota li, matul din is-sena li qegħdin fiha, it-tkabbir ekonomiku se jkun ta’ sitta fil-mija, waqt li s-sena d-dieħla u ta’ wara se jkun hemm tkabbir ekonomiku ta’ ħamsa punt tlieta fil-mija u tlieta punt tmienja rispettivament.
Id-Direttur tad-Diviżjoni Ekonomika tal-Bank Ċentrali ta’ Malta, Aaron Grech, qal lil One News li, minkejja li r-rata ta’ tkabbir ekonomiku mistennija tbatti xi ftit minħabba ċ-ċirkustanzi internazzjonali, dan it-tkabbir se jkun ferm ogħla kemm minn taż-Żona tal-Ewro kif ukoll mill-medja storika ta’ pajjiżna stess.
Qal, “Ir-raġuni għaliex l-ekonomija Maltija se tkompli tikber hija l-fatt li l-konsumatur Malti għadu m’għadux jonfoq daqs kemm kien jonfoq qabel. Fl-istess ħin għad hawn ħafna tifdil, li huwa aktar minn dak li kellna qabel il-pandemija u dan ifisser li għad baqa’ ħafna skop biex il-konsum jerġa jogħla.”
Ir-rapport tal-Bank Ċentrali juri wkoll kif l-inflazzjoni, li żdiedet f’daqqa s-sena li għaddiet, għandha tonqos is-sena d-dieħla.
Il-Bank Ċentrali nnota kif it-tkabbir tal-ekonomija f’pajjiżna s-sena li għaddiet huwa ta’ aktar minn punt perċentwali ogħla mit-tnaqqis li ġabet magħha l-pandemija fis-sena ta’ qabel, l-elfejn u għoxrin. B’hekk, il-Bank Ċentrali kkonferma li s-sena li għaddiet l-ekonomija Maltija rkuprat mid-daqqa tal-pandemija u ħafna iżjed b’saħħitha mill-irkupru fiż-żona tal-ewro.
Ir-rapport jgħid li filwaqt li numru ta’ setturi, fosthom dak tat-turiżmu, għadhom taħt il-livelli ta’ qabel il-pandemija, hemm ħafna setturi oħrajn li l-attività tagħhom hija ferm ogħla minn ta’ qabel il-pandemija. Il-livell ta’ investiment f’pajjiżna huwa ta’ għaxra fil-mija aktar milli kien qabel il-pandemija.
Dan ir-rapport tal-Bank Ċentrali jinnota wkoll kif is-saħħa tal-irkupru ekonomiku wasslet biex l-impjiegi komplew jiżdiedu b’rata tajba. Ir-rata tal-impjiegi f’pajjiżna hija ferm ogħla mill-medja Ewropea. Dan wassal biex pajjiżna għandu l-inqas rata ta’ qgħad fl-istorja.
Ir-rapport tal-Bank Ċentrali jgħid ukoll kif ir-rata tal-impjieg mistennija tkompli tiżdied bi kważi 2 fil-mija kull sena sal-elfejn erbgħa u għoxrin. L-akbar żieda fl-impjieg se ssir din is-sena, hekk kif mistenni jkun hemm żieda ta’ tnejn punt sitta fil-mija.
Il-Bank Ċentrali qal li l-irkupru ekonomiku s-sena li għaddiet fisser li d-defiċit tal-Gvern kien anqas minn dak previst. Kien imbassar li d-defiċit jaqbeż is-sittin fil-mija tal-ġid nazzjonali, iżda baqa’ sew taħt dan il-livell. Dan it-titjib fil-finanzi tal-Gvern sar permezz ta’ rkupru bis-saħħa fil-finanzi tal-Gvern u mhux għax tnaqqset l-ispiża.
Fir-rigward tal-gwerra tal-Ukrajna din mistennija twassal għal pressjoni fil-prezzijiet internazzjonali. Iżda hawnhekk il-prospetti tal-ekonomija Maltija xorta se jibqgħu pożittivi, anki meta mqabbla mal-pajjiżi Ewropej.
