F’pajjiżna għad m’hawn l-ebda każ ta’ Coronavirus li ġie trażmess minn persuna għal oħra.
Iddikjara dan id-Deputat Prim Ministru u Ministru għas-Saħħa Chris Fearne fil-Parlament it-Tlieta filgħaxija fi stqarrija ministerjali dwar il-miżuri li ħa l-Gvern biex jilqa’ għal Coronavirus.
Huwa sostna: “S’issa f’Malta għad m’għandna l-ebda każ ta’ trażmissjoni tal-virus f’Malta stess.”
Dan ifisser li s’issa m’hawn l-ebda persuna li ġie infettata mill-virus f’Malta.
L-istqarrija tad-Deputat Prim Ministru bdiet tard wara li s-seduta parlamentari kellha tiġi sospiża għax il-Kap Nazzjonalista wasal tard.
Il-Deputat Prim Ministru u Ministru għas-Saħħa kompla jgħid: “Xtaqt nitlob il-permess tal-kamra anka bil-permess tal-Viċi-Prim Ministru jekk jistax jikkonċiedi żewġ minuti. Il-Kap tal-Oppożizzjoni qiegħed wasal il-Furjana jekk hux possibbli nistennew żewġ minuti bil-permess tal-Kamra sakemm ikun wasal il-Kap tal-Oppożizzjoni.”
Madankollu fl-intervent tiegħu huwa beda biex jilmenta li l-Prim Ministru ma kienx fil-Kamra. Delia stqarr: “Nuri d-diżappunt tiegħi li għal darb’oħra l-Prim Ministru għażel li fid-dawl ta’ dak li huwa preokkupazzjoni nazzjonali, għażel għal darb’oħra li l-ogħla istituzzjoni tal-pajjiż ma jiġix u jindirizza huwa stess inprimis.”
Id-Deputat Prim Ministru rrimarka li s-seduta kienet bdiet 40 minuta qabel u l-Prim Ministru kien preżenti fil-Kamra.
Huwa saħaq: “Għadna kemm issospendejna l-Kamra għax il-Kap tal-Oppożizzjoni kien għadu ma wasalx għax kien għadu xi mkien il-Furjana. Issospendejna l-Kamra u issa qed jgħid għax qagħdna nistennew lilu, dak il-ħin il-Prim Ministru hawn kien.”
