It-tiġrif tat-tieqa tad-Dwejra, kienet riżultat ta’ mewġ qawwi mill-Majjistral li ħakem iż-żona tul il-lejl u li wasslet biex il-ġebla tal-franka iddajfet biżżejjed biex ċediet l-istruttura. Din kienet ir-raġuni identifikata fir-rapport preliminari li ħejjiet l-ERA dwar x’ wassal biex il-proċess naturali li kien prevvist, ħaffef il-pass.
“L-ebda intervent uman ma seta’ jwaqqaf dan il-proċess naturali” stqarr il-Ministru għall-Ambjent Jose Herrera.
Herrera qal li se jitlob lill-ERA, li hija responsabbli mis-sit, biex tikkummisjona studju fil-fond biex tidentifika r-raġuni ewlenija għat-tiġrif.
Ir-rapporti ikkummisjonati fis-snin li għaddew, dwar iż-żona lkoll kienu jipprevedu dan ir-riżultat iżda mhux daqstant malajr saħaq Herrera li fakkar kif fl-aħħar xhur il-gvern waqqaf steering committee li lkoll qablu li l-intervent uman ma kienx irrakomandat għaliex kien jikkawża sfreġju fih innifsu mingħajr ma jħalli impatt dejjiemi.
Herrera sostna li l-gvern kien konxju tal-periklu fiż-żona u għalhekk daħħal numru ta’ miżuri ta’ prevenzjoni biex in-nies ma jgħaddux minn fuq jew taħt it-tieqa, fosthom ordni ta’ Konservazzjoni t’ Emerġenza li daħħlet fis-seħħ multi għoljin għal min jagħmel dan. “Ma setax isir iktar minn hekk” sostna Herrera.
“Għawdxin qishom tilfu biċċa minn ġisimhom” stqarr il-Ministru għal Għawdex Anton Refalo.
Li min-naħa tiegħu wkoll ikkonferma kif saħansitra l-esperti mibgħuta mill-UNESCO ikkonfermaw li dan kien proċess irriversibbli. Refalo semma b’ mod partikolari l-istudju tal-Professur Vincent May li stqarr propju dan.
Il-Ministru għal Għawdex sostna li ż-żona tad-Dwejra xorta għandha potenzjal kbir x’toffri bħala Sit ta’ Natura 2000. Għalhekk appella lill-ministeri biex jissoktaw jaħdmu flimkien biex id-Dwejra tibqa’ ġawra għalina l-Maltin u Għawdxin u għat-turisti.
Bħala sit ta’ Natura 2000, iż-żona taqa’ wkoll taħt il-Ministeru għall-Kultura u għalhekk Owen Bonnici iddeskriva dan l-episodju bħala wieħed li jista’ joffri rizolużjoni iktar b’ saħħitha biex l-ambjent naturali Għawdxi jiġi ivvalorizzat iktar u jkun imħares iktar.
Wieħed ma jistax ma jħarisx lejn l-aspett turistiku, u l-Ministru Edward Zammit Lewis assigura li minkejja li t-tieqa tad-Dwejra kienet ‘ġojjell strateġiku’ li minnha nnfisha kienet tattira t-turisti, il-politika turistika mfassla għal Għawdex tinvolvi siti oħra li se jżommu l-livell rekords tat-turiżmu f’ Għawdex ‘on track’.
