Fl-Al Janoub Stadium, minn Grupp D, kellna t-Tuniżija kontra l-Awstralja. Fl-ewwel logħbiet tagħhom l-Awstraljani tilfu 4-1 kontra Franza u t-Tuneżini kellhom draw ta’ mingħajr gowls mad-Danimarka.
Fit-23 minuta, wasal gowl maħdum tajjeb mill-Awstraljani, bil-kross ta’ Goodwin lejn Duke li kkonkluda bir-ras.
Fl-40 minuta, t-Tuneżini kienu viċin b’azzjoni perikoluża fil-kaxxa u Mooy ddefenda tajjeb sabiex evita l-ħsara.
Tliet minuti wara reġa’ kien Duke b’daqqa ta’ ras, iżda l-konklużjoni tiegħu kienet ċentrali lejn il-gowlkiper avversarju.
Matul it-tieni taqsima kien hemm diversi tentattivi fuq kull naħa, iżda ħadd minnhom ma rnexxielu jsib ix-xibka għal darb’oħra.
Skor finali Tuniżija 0 Awstralja 1, bl-Awstraljani iħarsu ‘il quddiem lejn il-kwalifikazzjoni għall-fażi li jmiss.
Fil-17:00, mill-istess grupp ikollna l-konfront kollu Ewropew bejn Franza u d-Danimarka.
RItratt: Noushad Thekkayil/EPA.
