Hekk kif qed tkompli tbaqbaq il-kontroversja dwar l-allegazzjonijiet ta’ korruzzjoni fit-tmexxija tal-Parlament Ewropew, l-avukat tal-Viċi President tal-Parlament Ewropew, il-Griega Eva Kaili, li qed taffaċċja akkużi serji ta’ korruzzjoni, qal li l-Qatar ma kellux għalfejn ixaħħamha għax kienet qed timplimenta pjan usa’ tal-UE u kienet qed tingħata l-ordnijiet mill-President tal-Parlament, Roberta Metsola.
Dan ħabbru l-portal awtorevoli tal-aħbarijiet, Euractiv, li rrapporta li l-uffiċċju ta’ Metsola, min-naħa tiegħu, ipprova jiddefendiha billi qal li Metsola lill-Viċi President tagħha tatha struzzjonijiet fuq kif tirrappreżenta l-pożizzjoni tal-Parlament Ewropew u “xejn aktar”.
Iżda, l-avukat ta’ Kaili, Michalis Dimitrakopoulos, qal li “l-Qatar ma kellux għalfejn ixaħħam lis-Sinjura Kaili għax hija marret il-Qatar bħala rappreżentanta tal-Parlament Ewropew. Id-diskorsi u l-intervisti li tat tathom wara li kien hemm qbil u ordni min-naħa tal-President Roberta Metsola.” Filwaqt li sostna li Kailli ma ħadet l-ebda inizjattiva u ma kellha l-ebda aġenda, qal li hemm id-dokumenti li jippruvaw dan.
Kien nhar il-Ġimgħa li għadda meta Kaili u s-sieħeb tagħha, flimkien ma’ eks deputat Parlamentari Ewropew ġew arrestati mill-Pulizija Belġjana fuq suspetti ta’ korruzzjoni.
Il-Prim Ministru tal-Belġju, Alexander De Croo, ikkummenta li “apparentament, il-ġustizzja Belġjana qed tagħmel dak li falla milli jagħmel il-Parlament Ewropew.” Huwa żied jgħid li l-Parlament Ewropew għandu ħafna mezzi kif jirregola lilu nnifsu, “iżda, apparentement is-sistema ma kinitx biżżejjed”.
Aqra aktar:
